أمير عيد يهاجم هوس النجوم بالمشاهدات: أنا مش كيس شيبسي

علق الفنان أمير عيد على فكرة تباهي النجوم بتحقيقهم أكثر مشاهدات، أو حضور أكثر عدد من الجمهور حفلاتهم، خلال حفله في ختام مهرجان العلمين.

قال أمير عيد في حفل كايروكي بمهرجان العلمين: «الأرقام عمرها ما كانت معيار إن الفنان جامد، الشخص بيبقى فاضي من جوه فبيحب يملى من برة».

تصريحات أمير عيد

وتابع: «الحاجات الرخيصة هي أكتر حاجات بتتباع، والسوشيال ميديا بتحسسنا إننا مش عايشين، الناس بتتباهى بالعربيات والفلوس والساعة، افتكر أمي مرة قالت لي كلمة، عمرك ما هتبقى شخص غني إلا لو عندك حاجة الفلوس متشتريهاش».

وأشار أمير عيد إلى أن الفنان الحقيقي يقاس بأعماله القيمة وليس بالمشاهدات، أو قائمة الأكثر مشاهدة أو استماعا عبر مواقع التواصل الاجتماعي والمنصات الرقمية.

 أمير عيد في مهرجان العلمين

واختتم: «وأنا جاي العلمين على الطريق ناس كتير قابلتني وطلعت التيكت من العربية وكان فيهم حماس شديد، الموضوع عمره ما كان بالعدد، الموضوع بالروح اللي هما بيدهولنا، حتى لو الحضور النهاردة كان نص الناس أو 10 أشخاص بس كنت هعمل الحفلة وهكون فخور بده حقيقي، المهم مش كام، المهم بالقيمة مش بالكم، أنا بعمل أغاني بحبها مش عشان أكون براند أو سلعة، انا مش كيس شيبسي عشان أبيع أكتر حاجة، أنا فنان حر والشيء اللي بيحركني هو عقلي».