«أنتي فاشلة وعجزتي».. لقاء الخميسي لمنتقديها: «صلّوا واتقوا ربنا وبطلوا أحكام على الناس»

عبرت الفنانة لقاء الخميسي، عن استيائها من تعليقات بعض من جمهورها أثناء البث المباشر عبر صفحتها الرسمية على تطبيق تيك توك.

وقالت لقاء الخميسي، من خلال مقطع فيديو نشرته على صفحتها على تيك توك: «بقالي كام فيديو بكلم البنات والستات، وبقولهم حاجات ممكن تفيدهم، في ناس لطيفة بتسأل وانا بجاوب على قد ما بقدر وروحهم حلوة وجُمال، وفي ناس تانية بتحب قوي تدخل تبوظ المود، ودول يا حرام محتاجين حد يصلح حالتهم النفسية، ويخرّج من جواهم المشاكل اللي بتخليهم طول الوقت سلبيين، ومتصورين أنهم بيدوا رأيهم».

وأضافت لقاء الخميسي قائلة: «في حين إن الناس اللي بتدي رأي المفروض أنها تبقى ايجابية، لكن هم حبايبي سلبيين بس لازم يدخل يجوّد أو يشتم، أو يتفه من المعلومة، أو يقول كلمة من الكلمات اللي ملهاش قاموس، بمعنى مثلاً واحد في الفيديو اللي فات بيقولي أنتي عجزتي قوي، حبيبي ما حضرتك هتعجز وكل الناس هتعجز، أنت شايف إني معجزة بس أنا شايفة إني لسة صغيرة».

وتابعت لقاء الخميسي حديثها قائلة: «اللي بيدخل يقول أنتي بتكتبي عن أسامي كتب بالإنجليزي، منا قولت إنها موجودة بالعربي وليها ترجمة في المكتبة، واللي قولي أنتي فاشلة، الناس اللي بتحكم على الناس وهي ماتعرفهاش او حتى تعرفها الناس دي مريضة، وهم بيقولوا على الناس اللي فيهم همّ، يا حبايبي روحوا اقرأوا، ولو الصلاة بتريحكم صلّوا وادعوا ربنا أنكم تتقوا ربنا وتبطلوا أحكام على الناس وسخافات وألفاظ غير لائقة وغير مهذبة، وأكيد لو عندك طفل أو طفلة وربتهم بنفس طريقتك هيطلعوا شبهك بالظبط، وبالتالي اعتقد إنك هتبقى شخص مش عارف يعيش حياته ومش عارف يستمتع ومش عارف ينجح».

واستكملت لقاء الخميسي، قائلة: «فارجعوا كلامكم قبل ما تكتبوا تعليق لأي حد، واللي مش عاجبه ما يدخلش، أنا مثلاً مابحبش س فمش هدخل عنده، ومش هبصله ومش هعلق، وأنا لا بكرهه ولا بحبه فمش هدخل أعلق وأجود عشان أحس إن انا مهم، لأن والله اللي بيعمل كده مش مهم ده مريض، وشكرًا بحبكم وبحب صحابي».

@lekaaelkhamissiعلشان تهدو وتتعلمو تتقبلو و تحترمو الآخر حتى لو مش بتحبوه ، حطوا نفسكم وحطوا اللي بتحبوهم في نفس الموقف وراقب احساسك ! خليك في حالك وسيب الناس في حالها واللي مش عاجبك ابعد عنه وارحم نفسك من الغل والكره والامراض النفسية يمكن تعرف تحب نفسك واللي بيعرف يحب ربنا ويحب نفسه عمره مابيعرف يكره ! لأن الله تعالى هو الحُب ذاته 🕊🤍

♬ original sound - Lekaa Elkhamissi