إيمان العاصي: تخليت عن أحلامي الشخصية وبقول لبنتي متتجوزش

ياسمين حمادة 29 ابريل 2023 | 11:02 مساءً

قالت الفنانة إيمان العاصي إنها شخصية مترددة ومتسرعة لا تتعلم من أخطائها، وكشفت عن نصيحتها لابنتها الوحيدة.

تصريحات إيمان العاصي

قالت إيمان العاصي في تصريحات تلفزيونية لها: أنا مترددة ومتسرعة وبخاف ومش بتعلم من غلطي وبعمل نفس القرارات.. لكن أنا شخصية بفكر كتير وأي مشكلة بتكبر جوايا مش لاقية حل واستسلمت إن دي طبيعتي».

وتابعت حديثها عن نفسها قائلة: «لكن مش مبسوطة وتخليت عن أحلامي الشخصية لأن فيه أولويات وأتجنب أقعد مع نفسي لإني خلفت وأنا 23 سنة وتحملت المسئولية، وبقول لبنتي أوعي تقوليلي عايزة أتجوز وبحب حد».

وأضافت: «أنا ظلمت نفسي في شغلي بسبب كسلي وحاولت أسترجع شغفي وخبر اعتزالي كان كذبة، طبعًا أنا قابلت كتير وتعرضت لسوء حظ في علاقاتي مع الناس وفيه ناس ضحكوا عليّ في مجال التمثيل».

إيمان العاصي وابنتها

وقالت إيمان العاصي أيضًا: «مش بكون قادرة أخد حقي منهم وبكتفي بأني أقطع علاقتي بالأشخاص دول، وبحاول أخلي بنتي عكس كدا وتتعود تاخد حقها لأن مع الأسف العالم مفتقد للإنسانية».

واستكملت: «أنا نفسي أشوف بنتي ناجحة ومش شرط أشوفها عروسة.. عايزاها تلف العالم وتكون مبسوطة وشايفة الجواز في العشرينيات غلط والمفروض الواحد يتجوز في أوائل الثلاثينيات».

وقالت إيمان العاصي أيضًا: «عشان لو عايزة تخلف رغم أن العالم مش ناقص خلفة، وبنتي بتحس بيا بشكل مش طبيعي وهي أحن حد عليا في الكون وأصدق حد في حياتي بكل ما تحمله الكلمة من معنى».

إيمان العاصي وابنتها

ابنة إيمان العاصي

وأضافت عن ابنتها : «بنتي غريبة جدًا خاصة أن هي طفلة ومش عارفة بتفكر كده إزاي ولما بتحس إني مضايقة حتى لو مبينتش بتعرف ولو زعلانة من حاجة بتحبس دموعها علشان ما اتأثرش، وبقيت أدعي ربنا أنه يخليني ليها لأنها أحلى حاجة في الحياة وصاحبتي أوي وبحكي لها اللي ممكن أحكيه لحد في سني».

واختتمت: «لما بكون معجبة بحد بقول لبنتي وكأنها 30 سنة، ومفيش حاجة بخبيها عنها لأني خايفة مكملش ومقدرش أعيش لها ونفسي تقدر نفسها وتحب نفسها وتكون هي رقم واحد من غير ما تكون أنانية ومتثقش في حد غير نفسها وأنا لأني مش عايزاها تتوجع».

إيمان العاصي وابنتها