ابعد عن المطبلاتية.. ميدو ينصح مرتضى منصور: «فتح الصدر بيودي في داهية»

علق أحمد حسام ميدو، لاعب نادي الزمالك ومنتخب مصر الأسبق، على ما تردد مؤخرًا من عدد من مسئولي القلعة البيضاء على رأسهم مرتضى منصور رئيس النادي، أن استكمال الفريق لمسابقة الدوري جاء من أجل الفوز على الأهلي فقط، واصفًا تلك التصريحات بـ«العبث».

وكتب أحمد حسام ميدو، عبر حسابه الشخصي على موقع التواصل الاجتماعي «تويتر»: «الحديث على إن الزمالك استكمل الدوري من أجل الفوز على الأهلي فقط عبث وكلام لا يليق بنادي الزمالك ولا بلاعبيه ولا بجماهيره.. وأتمنى من المطبلاتية المنتفعين عدم ترديده.. الزمالك خسر الدوري ولكن لازم يشارك في بطولة إفريقيا أبطال الدوري السنة اللي جاية وان شاء الله نفوز بالبطولة السنه دي».

وأضاف: «أمير مرتضى أهم عنصر في منظومة نادي الزمالك في الفترة الأخيرة وآدائه تطور بشكل كبير مع الخبرات اللي بيكتسبها مع الشغل..من أهم ميزاته أنه يعلم كيف يتعامل مع رئيس النادي وبيفلتر المشاكل قبل ما توصله ودي ميزه مهمة جدًا في إدارة الأمور داخل نادي الزمالك ويمكن تكون الأهم!!».

واستكمل ميدو حديثه: «أذكر المستشار مرتضى منصور بإن اللي دخلك في مشاكل كبيرة في 2005 هما المطبلاتية اللي كانوا حواليك اللي كانوا بيحاولوا يستفيدوا منك وكانوا بيصدرولك المشاكل مستغلين طبيعة شخصيتك.. أنت عملت حاجات كويسة كتير ماتخليش الناس اللي بتستفيد من نادي الزمالك بس وتمص دمه تحاول توقعك مرة تانية».

واستطرد: «وجودك على رأس إدارة نادي الزمالك مهم جدًا في التوقيت الحالي وحتى في المستقبل القريب!! وجودك صداع في راس الناس اللي بتحاول تهد نادي الزمالك منذ سنوات!! لازم تحافظ على مكانك بإبعاد أصحاب المصالح من حولك من يعطوك النصيحة الخطأ ويقولون لك نعم وآمين فقط من أجل مصالحهم الشخصية..».

واختتم حديثه: «فتح الصدر بيودي في داهية وأنت أكتر واحد عارف كده..مفيش حد كبير في البلد دي وأنت أكتر واحد عارف كده!! حسني مبارك الله يرحمه ورجالته كلهم اتحبسوا.. تاني خلي بالك لازم يكون حواليك على الأقل واحد بيقولك لا ده غلط..نصيحتي ليك أنا عارف إنه ابنك الصغير بس دائمًا قبل ما تتحرك اسمع كلام أمير».