ابنة الفنان أحمد راتب: كان يقف على المسرح وحرارته 40.. هفضل أدعيلك لحد لما أجيلك

تحدثت لمياء ابنة الفنان أحمد راتب، عن كواليس عمل والدها الفنان الراحل في المجال الفني، مشيرة إلى أنه واجهته الكثير من الصعوبات خلال هذه الفترة.

ابنة الفنان أحمد راتب تتحدث عنه

قال ابنة أحمد راتب، عبر حسابها بموقع التواصل الاجتماعي فيسبوك: 'تصدق يا بابا إن لحد دلوقتي في ناس فاكرة أن شغلك كان سهل، أنه كان هزار ولعب وشهرة بس.. ميعرفوش إننا كان ممكن نقعد يومين منشوفكش من غير ما تكون مسافر لأنك كنت بتصور 18ساعة متواصلة، ميعرفوش أنك كنت بتقف على المسرح ودرجة حرارتك 40، ميعروفش أنك كان ممكن تنام ربع ساعة في كرافان فالتصوير لحد لما المشهد يجهز، أو تقعد تستنى 3 ساعات عشان يظبطوا إضاءة مشهد هياخد فتصويره ساعتين وهيظهر على الشاشة 3 دقايق'.

وتابعت: 'ميعرفوش أنك كنت بتلبس صوف في أغسطس وبتنزل البحر فـ يناير، ميعرفوش أن مناخيرك اتكسرت في تصوير مشهد وأثرت على حياتك كلها، ميعرفوش أنك كنت بتحترم المخرج وتسمع كلامه وتقول له يا أستاذ حتى لو أصغر منك بعشرين سنة'.

واختتمت لمياء ابنة الفنان أحمد راتب حديثها وقالت: 'أنا فخورة قوي إني بنتك، أنا عمري ما هنسى تعبك وشقاك اللي كبرت عليهم، أنا عمري ما هنسى أنك كنت أحن أب وإنسان فالدنيا.. ربنا أنعم عليك أنك تربي بناتك التلاتة وتجوزهم وتشوف ولادهم، وبعت لك حج بيته لحد عندك هدية من شركة السياحة لكل طاقم عمل مسلسل أم كلثوم،.. لو مكنتش فالجنة بكل اللي فات ده، فأنت فالجنة بقلبك السليم الطيب.. بحبك قوي وهفضل أدعي لك لحد لما اجيلك'.

أرملة أحمد راتب تتحدث فترة مرضه

وعلى جانب أخر تحدثت السيدة فيرا أرملة أحمد راتب  في تصريحات تلفزيونية سابقة عن فترة مرضه، وقالت: 'كان عنده مشكلة كبيرة في الرئة حوالي سنة وكان دايمًا يحصله سدة رئوية وضيق في التنفس ويدخل العناية المركزة لمدة أربع أو خمس أيام ويخرج'.

وتابعت السيدة فيرا، حديثها وقالت: 'وفي يوم من الأيام دخل المستشفى لمدة أسبوع في العناية المركزة وكنا فاكرين إنه هيرجع زي كل مرة ولكن توفي'.

وأضافت: 'أزواج بناتي راحوا المستشفى قالولهم إن المسألة خلاص مجرد ساعات ويتوفى، فجوز بنتي مسح كل الأرقام علشان ميتصلوش عليا، وبعدين رجع وقال بابا فاق وعايز يشوفنا ولكن أنا كنت حاسة إنه توفي'.

أحمد راتب

أرملة أحمد راتب تتحدث عنه

تطرق الحديث مع أرمة أحمد راتب، عن غيرتها عليه من المعجبات، وقالت: 'زميلاته أخواتي والوسط متفاهمين وقريبين من بعض والمعجبات يعتبر أنهم نوع من شغله عمره ما إداني إحساس أني أغير'.

 شائعة زواج أحمد راتب على زوجته

استكملت السيدة فيرا حديثها، عن موقف تعرضت له أثناء زواجها من أحمد راتب، وهو وصول خبر لها أنه تزوج عليها، وقالت: 'كان في وقت موسم شغل جامد ومكنتش بلحق أشوفه، ووصلني إشاعة إنه متجوز عليا وقاعد في شقة في مصر الجديدة بكل التفاصيل، طبعًا أنا علشان في ثقة مصدقتش، وهو عرف الموضوع ده بعد 15 سنة لما قولت في برنامج'.