«اتحاربت».. قصة 25 فيلما لـ يسرا مُنعوا من العرض وحقيقة رفض صالح سليم زواجها من نجله

كشفت الفنانة يسرا أسرار من حياتها الشخصية والمهنية لأول مرة، وسر محاربتها في بدايتها الفنية بجانب كواليس أول لقاء جمعها بالمخرج الراحل يوسف شاهين، وحقيقة رفض صالح سليم زواجها من نجله.

قالت يسرا عبر تصريحات تلفزيونية، إنها تعرضت لحروب وصراعات في بداية مشوارها الفني، مضيفة: «عملت 25 فيلم في 4 سنين ومنزلوش، وكانوا بيسموني النجمة المعلبة، أول ما بدأت أول سنة عملت 6 أفلام، وتاني سنة 5 أفلام لكن منزلوش وقتها، وأما اتعرضوا بعد فترة كبيرة كلهم فشلوا».

أسرار يسرا

واستكملت: «بداياتي كانت صعبة جدًا لأن كان فيه وقتها نجمات نجلاء فتحي وميرفت أمين ومديحة كامل وقبلهم سعاد حسني ونادية لطفي وعشان أثبت نفسي في وسط دول كانت مهمة صعبة أوي، وحضرت مونتاج فيلم الكرنك عشان اتعلم يعني إيه راكور وكنت أروح معهد السينما عشان اتعلم أبقى موديل ويصوروني، ويعملوا مشاريع التخرج وأبقى بطلتها، كنت حابة إني أكون موجودة».

وقالت أيضًا: «عملت مع حسين الإمام ألبوم غنائي اسمه بحب السيما فيه 10 أغاني متصورة وعمره ما نزل، علشان كدة اسمي النجمة المعلبة، لكن جات الحرارة هي اللي نجحت، مضيفة أن أغنيتها 3 دقات مع أبو، حققت بليون مشاهدة».

وفيما يخص اسمها الحقيقي، قالت يسرا: «أنا اسمي في شهادة الميلاد يسرا لكن وأنا صغيرة كانوا بيقولولي سيفين محمد، وهو اسم تركي، لكن أما كبرت اتفاجأت إن اسمي يسرا».

يسرا

زيجات يسرا

وأوضحت أنها تزوجت مرتين، الأولى لم تكن سعيدة بها، معلقة: «مكانش جوازنا ناجح ومعرفناش بعض كفاية وهو اتوفى خلاص، ووقتها حملت لكني فقدت الجنين، والمرة التانية كانت من خالد جوزي وأعرفه من وإحنا 7 سنين، وإحنا صحاب من زمان وهو يعرف عني كل شئ، وقالي لو كنت قابلتك زمان وإحنا صغيرين يمكن مكناش نكمل».

وأضافت يسرا: «طلع عليا شائعات واتقال إن زوجي خالد خاني مع زميلة واتطلقت، واتقال إن صالح سليم مكنش موافق على جوازنا وده كلام غير صحيح وصالح سليم هو اللي مربيني وكان صاحب خالي، وما أعلناش عن جوازنا بسبب مرضه، لدرجة أنه قبل ما يسافر يتعالج خارج مصر كان عايز يعلن زواجنا بنفسه ووقتها شوفنا أنه ملوش لازمة نطمن عليه ده أهم».

وفيما يخص حقيقة رفضه زواجها من نجله خالد سليم، علقت قائلة: «الكلمة الوحيدة اللي قالها صالح لـ خالد، هو إن الست دي نجمة لو هتستحمل نجوميتها ومتقرفهاش خدها لو مش هتستحملها سيبها في حالها».

طفولة يسرا

أما عن طفولتها، قالت يسرا إن أول لقاء بينها وبين والدها كان عمرها 5 سنوات، معلقة: «بابا كان مطلق ماما من قبل ما أتولد، وأول مرة أشوفه كان عندي 5 سنين وعشت معه من سن 14 حتى 21 سنة، وخدني غصب عني ليضايق والدتي».

كما تحدثت يسرا عن تفاصيل أول لقاء بالمخرج الراحل يوسف شاهين، أعربت عن حبها الشديد له في أول لقاء بينهما، وقالت: «أنا مكنتش شوفت يوسف شاهين، بس أعرفه وأول ما شوفته قولتله أنا بحبك، وهو قال قبل كدا عليا أنه خدني أمثل معاه وأنا نجمة أنا معملتهاش نجمة».

يسرا

يسرا