"الإعلان أصعب من الأغنية".. إيهاب عبدالواحد يوضح سر نجاح «زمن الشقاوة» لـ حسين فهمي

تحدث الملحن إيهاب عبدالواحد عن نجاحه في موسم ألبومات صيف 2026، وكواليس تعاونه مع النجوم عمرو دياب، وأنغام وتامر حسني.

قال إيهاب عبدالواحد في لقائه مع الإعلامية شيرين سليمان ببرنامج سبوت لايت، على قناة صدى البلد، عن تقديمه أغاني مبهجة وحزينة درامية في نفس الوقت: «مصر يا تفرحها وتهيصها، أنا بعشق أضحك الناس وأفرحهم يا إلا يالا بينا نعيط بجد وكمان بنحب نرقص على أحزاننا ولينا طرق خاصةً نعدي بيها المشاكل وده بيعجبني في المصريين».

وفيما يخص النجاح الكبير الذي حققه بأغنية إعلان وربطه بالفنان حسين فهمي وجملة «راح فين زمن الشقاوة»: «أغنية الإعلان أصعب من الأغنية العادية لأن معاك منتج وإزاي تعمل المعادلة بين منتج تعلن عنه وفي نفس الوقت أغنية تمس قلبك وتسمعها في كل الأوقات، وهي معادلة صعبة والحمدلله إني من رواد أعمل الحاجتين مع بعض وأربط المنتج بالناس».

واستكمل إيهاب عبدالواحد: «مافرقش معايا إن أستاذ حسين فهمي مبيغنيش، أنا دايمًا بقول اللي بيعرف يمثل كويس جدًا هيعرف يغني ويؤدي لأن عنده بصمة، والإعلانات بالنسبة لي مسرحية غنائية تحتاج مؤدي وممثل بارع ومش شرط مغني، ولما حسين فهمي ومصطفى فهمي غنوها مكنوش متوقعين النجاح الكبير لكن سمعوا كلامي وصدقوني».

واختتم: «بسعى دائمًا لما أعمل أغنية متكونش موسمية وتستمر وتعيش مع بنتي وبنت بنتي، محدش هينسى راح فين زمن الشقاوة، ومحدش هينسى رمضان في مصر حاجة تانية والسر في التفاصيل، وبحب أجي عند الثوابت وأغيّرها والتغيير والتجديد مهم ويكون لجيلنا بصمة مثل الأجيال السابقة».