«الاستسهال آخره محدش بيكمل».. ياسمين عبدالعزيز تكشف سر اتجاهها للأكشن

كشفت الفنانة ياسمين عبدالعزيز سر خوضها تجربة الأكشن في السينما لأول مرة، والتي تعود بها بعد غياب لسنوات طويلة.

قالت ياسمين عبدالعزيز عبر تصريحات تلفزيونية: «ما ده التغيير بقى.. عشان الناس ما تزهقش.. نعمل دراما، نعمل كوميدي مرة، نعمل رومانسي مرة، نعمل أكشن».

وتابعت: «والممثل لازم يعمل كل حاجة.. صح ولا غلط؟.. يعني لازم يعمل كوميدي، ولازم يعمل أكشن، ويعمل دراما ويعمل رومانسي ورغم أن التجربة جديدة عليّ الناس مش هتصدق.. أنا بحفظ حركات الأكشن في ساعتها، وبعملها على طول».

واستكملت ياسمين عبدالعزيز: «الاستسهال آخرته مفيش حد بيكمل.. الجمهور دلوقتي ذكي، وبعدين مابيدخلش إلا لما يسمع الفيلم حلو ولا وحش ويدخل.. هتستسهلي هتلاقي وقتك قصر».

واختتمت: «لكن هتنقي، وهتشتغل، وهتتعب، وتفكر إن أنت تجيب مواضيع جديدة.. دلوقتي الناس كلها في الوقت اللي إحنا فيه، في حاجات أنا كنت بعملها زمان ماينفعش أعملها دلوقتي.. حتى الكوميدي اللي أنا بعمله دلوقتي، كوميدي بتاع دلوقتي، مش الكوميدي اللي أنا كنت بعمله زمان.. كنت زمان بستخدم أكتر جسمي وريأكشناتي.. بس الكوميدي دلوقتي أنا عاملاه بطريقة مختلفة، وبيضحك برضه.. دلوقتي الجيل اللي إحنا فيه والناس الضحك بتاعهم اتغير، فما ينفعش أعمل اللي كنت بعمله زمان».