الاعترافات الكاملة لـ سيدة الشرقية قاتلة ابنها: أنا معمولي عمل

حصل موقع قناة صدى البلد، على تفاصيل المواجهة التي تمت بين اللجنة الخماسية المكونة من أساتذة الطب النفسي من جامعتي الزقازيق والمنصورة، المكلفة بفحص سيدة فاقوس المتهمة بقتل ابنها وتقطيع جثته وتناول اجزاء منها بالشرقية حيث جاءت كالآتي:

س- كيف تجرأتي على قتل طفلك الصغير وتقطيعه؟

ج- كان معمول لى عمل مكنتش حاسة.

س- عملتى كدة ازاى؟

ج- معرفش كنت رايحة أنام لقيت نفسي رايحة على الولد جيبت يد فاس خشب وضربته لقيته مبيتحركش دخلت المطبخ جيبت سكينة وبدأت أقطعه.

س- استخدمتي شئ تانى زي ساطور؟

ج- لا

س- كنتي بتحاولي تخبيه ليه.. وليه حطيتي أيديه جوة الدولاب وقطعتيه أجزاء صغيرة؟

ج- كنت تحت تأثير العمل.

س- مين عمل لك العمل؟

ج- مرات عمي ومرات أخويا.

س- عرفتى منين؟

ج- كنت بصلي وادعي ربنا لحد ما عرفت.

س-عرفتي إزاى انه عمل؟

ج- الشيخ قال خليكي قاعدة هنا واخد ناس راح يحفر طلعه.

س- كملتى تعليم؟

ج- لحد سنة خامسة.

س- بتعرفي تقرأي وتكتبي؟

ج- آه.

س- كنتي بتشغلى ايه؟

ج- باليومية في مصنع.

س- طليقك كان كويس معاكي؟

ج- لا كان بيضربني ويقولي إن شكلي مش عاجبه.

س- طلقك إزاي؟

ج- روحت لمحامي ورفعت قضية.

س- انتي كنتي بتجري لنفسك ولا حد؟؟

ج- لا أنا.

س- أمك وأبوكي عايشين؟

ج- أمي بس.

س- بنيتي بيت بفلوس مين؟

ج- أخدت ميراثي، وعمى وقف معايا وخلاني أبني بيت.

س- انتي ندمانة أو زعلانة؟

ج- ندمانة بس أنا عيني من ضرب جوزي تعبت ومحتاجة عملية فمبقتش ببكي كتير.

س- انتي فاهمة هيحصل لك ايه؟

ج- أنا مستعدة أدفع دية أو كفالة بدل الإعدام.

س- لو موجودة لوحدك بتسمعي صوت حد بيكلمك؟ أو متخيلة حد عايز يئذيكي.. أو حد عايز يمشي وراكي أو يصورك؟

ج- لا.

س- كان إزاى رد فعل جوزك لما عرف؟

ج- كان بيزعق

س- يوم الواقعة وبعد ما ارتكبتيها الجريمة ظهرت تاني يوم.. إزاى قضيتى الوقت ده وأكلتى أيه؟

ج- ماكلتش كنت ببكي ونمت شوية وصحيت تاني أبكى لما عمي جه فتحت له شاف المنظر بلغ الحكومة.

س- لما خبطيه ومقامش مجاش في بالك تتصلى بالإسعاف؟

ج- مجاش في دماغي ياريتني عملت كدة.. اللي عملته خسارة ليا.

س- أبوه مكانش بيطلب ياخده؟

ج- كان عايز ياخده قولت هجيب كتب وأعلمه في البيت وأحبسه مش هيلعب علشان مياخدهوش.

س- انتي مجنونة ؟

ج- لا أنا معمول لي عمل.

س- مين رئيس مصر؟

ج- محمد السيسيز

س- الـ١٠٠ جنيه فيها كام ١٠ ج؟

ج- 10.

س- كنتي بتضربيي ابنك؟

ج- خفيف.

س- عمرك ضربتي قطة أو كلب أو فرخة أو موتيها؟

ج- لا خالص لو قطة دخلت بطردها.

س- مجاش ابنك قال هروح عند ابويا؟

ج- لا كان بيحب يقعد عندي.

وأدت اللجنة الخماسية من الطب النفسي من جامعتي الزقازيق والمنصورة، حلف اليمين أمام هيئة محكمة جنايات الزقازيق في محافظة الشرقية؛ بشأن ما كُلفت به لفحص قاتلة ابنها وبيان مدي سلامة قواها العقلية والنفسية.

وطالبت اللجنة الخماسية هيئة المحكمة بعمل أشعة رنين مغناطيسي على المخ بالصبغة للمتهمة واستدعاء الشهود وسؤالهم مرة أخرى.

وقررت محكمة جنايات الزقازيق برئاسة المستشار سلامة جاب الله رئيس المحكمة، وعضوية المستشارين هيثم حسن الضوي وخالد حافظ وشادى المهدي عبدالرحمن، وأمانة سر نبيل شكري، تأجيل محاكمة قاتلة ابنها في واقع وتقطيع جثته ووضعه داخل دلو وطهي جزء منه وأكله بقرية أبو شلبي التابعة لمركز فاقوس إلي جلسة يوم 22 من الشهر الجاري لعرض تقرير اللجنة.

تعود تفاصيل القضية رقم 8619 لسنة 2023 جنايات مركز فاقوس والمقيدة برقم 844 عندما أحالت جهات التحقيق أوراق هناء م ح 37 عاما مقيمة قرية شلبي التابعة لمركز فاقوس، إلي محكمة جنايات الزقازيق لاتهامها بأنها في يوم 27 أبريل من العام الجاري، قتلت المجني عليه الطفل 'سعد م س' ابنها وقطعت جثته إلى 9 أجزاء وطهت جزء منه وأكلته، وذلك عمدًا مع سبق الإصرار والترصد بأن بيتت النية على إزهاق روحه.

واعترفت المتهمة بقتل ابنها أمام جهات التحقيق حول دوافع القتل لديها قائلة: عايزة أريّحه وأرتاح.. عايزة انتقم من أبوه وأرتاح من كل شوية ييجي أبوه عايز ياخده، وأنها قامت بقتل ابنها باستخدام يد فأس خشبية وسكين وضربه على رأسه 4 ضربات وهو يستنجد تحت يديها ويتوسل لها أن ترحمه، ثم قامت بذبحة وتقطيع جسده وتشفيته بفصل اللحم عن العظم داخل الحمام، ثم وضعت إناء على النار وبه كمية من المياه ووضعت بها أجزاء من جسده ورأسه وسلختها وعبثت بها حتى أخفت معالمها.