الخطيب يوجه رسائل نارية للاعبي الأهلي قبل مواجهة إنبي

وجّه محمود الخطيب، رئيس النادي الأهلي، رسائل نارية للاعبي الفريق قبل مواجهة إنبي في الدوري، مطالبًا اللاعبين بالحفاظ على تاريخهم وتاريخ النادي خلال الفترة المقبلة.

قال محمود الخطيب في اجتماع مع لاعبي الأهلي في ملعب التتش:" كابتن وليد وكابتن عماد، وكل أفراد الجهاز الموجود هم إخوتكم. وكابتن وليد مسؤول الآن مسؤولية كاملة عن كل ما يخص قطاع الفريق الأول لكرة القدم".

وأضاف:" عايز أبتدي معاكم بحاجة في الكورة.. الكورة ليست أسماء، ولكنها جدعنة ورجولة وسباقات سرعة واحتكاك. الكورة كده، مش بالأسماء أبدًا. خدوا بالكم إننا قاعدين في ستاد مختار التتش، واحد من الأساطير اللي كانت موجودة، مرّ على النادي أساطير كثيرة جدًا أفضل مننا، لكن كله راح. أنتم الواجهة الحالية للنادي".

وتابع:" كلنا زائلون والأهلي هو الباقي، وسيبقى إن شاء الله. من صنع الاسم هو الأهلي، وهو يصنع أسماءً جديدة كل يوم. ما ينفعش الناس تلعب بأسمائها، ولكن بمجهودها ورجولتها. الفترة اللي فاتت ما كنتش أحب أبدًا تكونوا موجودين فيها بهذا الشكل".

وأردف:" الأهلي كيان وتاريخ ومبادئ وقيم وسيبقى كذلك. سيذكر النادي من يسير في نفس خطه. لازم نفكر إحنا ناويين نعمل إيه. اتكلمت معاكم قبل كده، وواضح إننا نسينا، وأنا مش هتكلم تاني".

واستكمل:" أنا عاوزكم تقدروا كيان الأهلي، وتحترموا جماهير النادي الأهلي. هو ده المطلوب منكم. الأهلي يصبر، لكنه لا يقبل أي شيء سوى من يساهم في رفع شأن هذا الكيان".

واختتم الخطيب:" كلنا عندنا ثقة كبيرة جدًا في كل واحد فيكم. انسوا الفترة اللي فاتت واشطبوا عليها ونشوف اللي جاي. وأنا متأكد إن التركيز لو زاد يا رجالة هتحققوا كل اللي تتمنوه والجماهير تتمناه. حافظوا على تاريخكم وتاريخ ناديكم، واحترموا جماهيركم، ونقرأ الفاتحة لبداية فترة جديدة كلنا مع بعض".