الرئيس السيسي: الأرقام اللي بنديها للأطقم الطبية غير مشجعة.. فيديو

قال الرئيس عبدالفتاح السيسي، إن الضامن الأساسي لإنجاز مشروعات بناء المستشفيات هو تولي الدولة ثلاثة أرباع المشروع ببناء المستشفى، مع ترك الربع الأخير للقطاع الخاص.

وتابع الرئيس السيسي على هامش مؤتمر حكاية وطن «بالنسبة لإمكانية القطاع الخاص من إنشاء مستشفيات، بقالي سنين طويلة موجود معاكم وكل يوم بشوف العجب، لو عايزين تضمنوا مسار ناجح، الدولة تخلص ثلاثة أرباع المشوار وتسيب الربع للقطاع الخاص، يعني أنا أعمل المستشفى بالمواصفات اللي أنت عايزها ثم تديرها»، مضيفا «مشروع بناء المستشفى سيستغرق حينها المدة المطلوبة التي تصل لعامين أو عامين ونصف ثم تسلم للقطاع الخاص».

وأضاف الرئيس السيسي: «ممكن يكون عندي 700 مستشفى لكن ظروف إدارتنا والأرقام اللي بنديها للأطقم اللي شغالة قد تكون غير مشجعة أو غير محفزة، أعترف كدولة وحكومة إننا مش قادرين نوفر رقم مناسب لكل اللي شغالين في كافة قطاعات الدولة وعلى رأسها التعليم والصحة»، مضيفا «بقول للمصريين لما تجد مستوى مش عاجبك، أوعى تقول الحكومة بتعمل إيه، أوعى تقول وزير الصحة بيعمل إيه، وهذا لا يعني قبولنا بالتهاون، لكن عشان تغير اللي أنت شايفه لازم تبقى مع الدولة بمزيد من العمل، أوعوا تفتكروا إنه ممكن يتغير بإنك تهدها، اللي أنت شايفه مش هيتغير غير بالعمل والكفاح والصبر ويمكن يكون الحرمان كمان».

وأردف: «المستشفيات الكبرى التي أنشأناها نعرضها للقطاع الخاص مقابل شراء الدولة للخدمة، مع تولي –القطاع الخاص- الإدارة».