الرئيس السيسي: ربنا صاحب الفضل في اللي حصل في شرم الشيخ.. وقضيتنا عادلة ومفيهاش ظلم

وجه الرئيس عبد الفتاح السيسي الشكر والحمد لله إلى الله عز وجل، مؤكدًا رغبته في توضيح نقطة مهمة، قائلًا: "عاوز أوضح نقطة مهمة، أولا خليني أرحب بيكم كلكم أهلا بيكم، ومن خلالكم أوجه كل التحية لكل المصريين والضيوف اللي موجودين في الاحتفالية دي واللي شارك فيها، السادة الفنانين والفنانات اللي على المسرح شكرًا جدًا".

وأضاف الرئيس السيسي خلال كلمته في احتفالية "مصر وطن السلام" بالعاصمة الإدارية: "لو عاوزين نشكر صاحب الفضل، وصاحب الفضل مش أنا، مش من سنتين من زمان، صاحب الفضل ربنا عز وجل، عايز أقولكم على حاجة من سنين بعد اللي حصل، الأيام الأولى في القطاع كانت هتبقي صعبة ورد الفعل كان هيبقى ضخم وهائل على الأشقاء الفلسطينيين".

وتابع: "كل الدعوات اللي كانت بتقول أنهم يمشوا من القطاع، صعبًا جدًا تكون لوحدك وبتفكر في الموضوع، طيب يتهجروا، بقولكم الكلام دا بعد سنين، القرار مسئولية، وكل ما تكون المسئولية كبيرة هيكون القرار كبير، كنا متأكدين من ربنا أنه المشكلة يكون لها مخرج، اللي كان بيطمني حاجة واحدة، يا ترى اللي بنعمله في مصلحة الفلسطينيين والسلام، الامر كان واضح وظاهر".

وأكمل: "في مصر والعالم كنا بنشوف حجم المعاناة في غزة، ولكن كل أمر ليه حساباته، والحسابات بتبقي دقيقة، واللي حصل في شرم الشيخ كان فضل كبير من ربنا، عاوزين نوجه الشكر إلى ربنا لأنه صاحب الفضل، عارف يعني إيه ربنا يساعدك، يعني قضيتك عادلة، مفيش ظلم فيها ولا افتراء أو تعدي على حقوق الآخرين".

وأردف الرئيس السيسي: "لازم الجامعات والمدارس بالتنسيق مع وزارات التربية والتعليم والرياضة تنظيم رحلات للطلاب والأطفال بسيناء، هناك في 6 أنفاق تحت القناة علشان تكون ربط بسيناء والدلتا".

واستطرد: "لازم نرحب بريتاج وكل زي ريتاج، شهر أكتوبر شهر النصر، النصر بيجي بقوة الشعب اللي بيرفض الهزيمة، الشعب اللي بيرفض الهزيمة ربنا بيعينه على النصر، كل سنة وأنتم طيبين، الحمدالله ودائمًا يا رب تحيا مصر".