الرئيس السيسي: صرفنا على الدولة 80 مليار بعد 25 يناير.. ولو خفت كان زمانكم في خراب

رد الرئيس عبد الفتاح السيسي، على تعليق النائب البرلماني عبدالمنعم إمام، خلال كلمته بالمؤتمر الوطني للشباب في الإسكندرية قائلا: واحنا بنناقش أي موضوع فالمناقشة دي خطوة من الخطوات للحل، الحوار الوطني والعفو الرئاسي خطوات للحل، وربنا لو نجانا مرة متستنوش ينجيكم مرة تانية، الفضل هنا مش لحد الفضل لله، ربنا نجاكوا يا مصريين، هو اللي عمل الانتخابات وجاب الناس مين؟ هو أنا اللي جبت الناس دي؟

وتابع الرئيس السيسي خلال كلمته بالمؤتمر الوطني للشباب في الإسكندرية: «بعد 25 يناير اتعملت حالة والدولة فكت، بعدين عملنا انتخابات، وبعدين انتخابات رئاسية جابت اللي أنتم شفتوه خراب في خراب يعني، علشان تتخلص من الخراب دا ومشفتش تداعياته جاي تطلب كل حاجة كاملة، إحنا صرفنا على الدولة 80 مليار بعد 25 يناير غير الإرهاب، والاحتياطي اللي اتعمل في 25سنة خلص في سنة ونصف».

وعلق الرئيس السيسي قائلا: «تم ضرب الكنائس ومحطات الكهرباء دا إنقاذ وطني، أنا مبخفش أبدا ولو كنت خفت كان زمانكو كلكوا في خراب ودمار، أنت ليه بتطلب الحد الأقصى لكل شيء؟، الدولة دي عاوزة 2 ترليون دولار في السنة معاك المبلغ ده؟، أنا مش معايا أموال تعمل تعليم وصحة، الطالب محتاج 10 آلاف دولار علشان تدي الطالب تعليم كويس، الأرقام المطلوبة مش موجودة والكلام دا بينتج عنه تردي في كل شيء».

واختتم الرئيس السيسي: «لو كل واحد يقدر يحل مسألة في مصر هصفق له، الكلام هنا حاجة والعمل التنفيذي حاجة تانية خالص، هي خطوات بمنشيها ونطول بالنا على بعض، أنت مفكرني كدولة وحكومة متقاعس، هتقاعس ليه؟،، أي طالب في كلية اقتصاد وعلوم سياسية يحط خطوات وخريطة للحل، لكن لو أنت بتعمله محتاج تنفذه بأفكار، أنا لو عندي 700 مستشفى نص العدد المطلوب للمواطنين، يعني نحتاج تكلفتين تشغيل وإنشاء، طب الرقم المطلوب مش موجود وهياخد فترة بجهدنا وشغلنا وصبرنا كلنا علشان نوفر الاستحقاق».

الرئيس السيسي: كيلو اللحمة بـ300 جنيه بسبب الدولار

الرئيس السيسي ينفعل على الهواء بسبب سعر الصرف: لو هيأثر على حياة المصريين منقعدش في مكاننا