الطبيب محمد علام بعد تعافيه من كورونا يروى رحلة عودته لمنزله: الناس بتبوس وتحضن.. مالهاش حل غير الستر والله

بعد خروج الدكتور محمد علام، نائب مدير مستشفى النجيلة، من مستشفى العزل وتعافيه من فيروس كورونا بعد إصابته منذ عدة أيام، نشر علام عبر حسابه على 'فيس بوك' صورة بعد أن غادر المستشفى متجها إلى منزله.

وكتب علام عبر حسابه على فيس بوك، 'الحمد لله خرجنا من المستشفى وفى طريقى لبيتى.. كل سنة وأنتم طيبين ويا رب دايما تكونوا بخير.. تجربة منحبش حد يجربها التباعد المجتمعى آمان لأهلنا التوعية هى الحل الوحيد الفعال الالتزام وأخذ الموضوع بجدية وعدم الاستهانة بالمرض.. بعتذر لأى حد كلمنى الأيام اللى فاتت ومعرفتش أرد عليه نفسيتى كانت وحشة وإن شاء الله أول مارجع بيتى هرد على كل الرسائل وكل التليفونات.. أرجع بس لحضن بناتى أشحن منهم طاقة ونفسيتى تتحسن شكرا ليكم وأسف بجد لو مردتش على حد'.

وعاد ونشر علام انطباعه الأول بعد الوصول لموقف الإسكندرية ليروي تفاصيل رحلة العودة وموجها العديد من الرسائل والنصائح وقال «بعد موصلت موقف الاسكندرية وشفت بعينى اللى بيحصل ويا ريتنى مشفت مفيش غير ٥ من ضمن المئات اللى شفتهم لابسين ماسكات ومنهم اتنين منزلينه من على وشهم كمان وكل الميكروباصات والاتوبيسات مش لابسين أي حاجة ممكن واحد فى كل ٥ ميكروباصات اللى الاقيه لابس ماسك وواحد فى كل اتوبيس».

وأضاف «انتوا واثقين فى نفسكم كل الثقه دى إزاي محصنين يعني . إيه يا جماعه لو انتم لقيتم حل يخليكم تنزلوا بكل الثقه دي عرفونا اهو نقفل المستشفيات ونشوف اهلنا على الأقل» .

وتابع عبر صفحته على الفيس بوك «المرض حقيقى واللى بيحصل ده هيخلينا قريب نشوف الرقم اليومى من ٤ ارقام والوفيات هتتضاعف خدونى عبره والله العظيم المرض حقيقى . مفروض باقى على الفطار دقايق والدنيا زحمه أومال الصبح الوضع كان إزاي والناس عماله تتف على الأرض وتبوس وتحضن بعضها ولا كأن فى أي حاجة. العربية اللى راكبها خدت الكرسي اللى جنبى ولابس ماسك وفاتح الشباك مش علشانى علشان الناس والكل مش لابس اى حاجه ولا حتى منديل على وشه وحاجه زى الفل . ربنا يسترها معانا علشان ملهاش حل غير الستر والله واننا ندعى ربنا. دمتم بأمان برحمه ربنا بينا الواحد محبط ومرعوب بجد» .

وختم قائلا «توضيح أنا مبلومش الناس وياريت محدش يغلط فيهم فى الكومنتات هلومهم على ايه بس هما مش مصدقين أو مش عارفين حاجه الحل انهم يفهموا . نفكر ازاى نوصل لكل الناس ان الوضع كده مش صح انزل واعمل كل اللى انت عاوزه بس صح كده حرام بجد . إن شاء الله الفتره الجاية هنفكر فى حلول مش بس نقعد نندب حظنا ونشتم فى الناس ربنا لحد دلوقت ساترها معانا لكن لحد امتا ؟؟؟؟!!!!».