الفنانة عنبر : ضحيت بالأمومة وتعرضت لضغوط في بدايتي الفنية

كشفت الفنانة عنبر العديد من أسرار حياتها وتخليها عن حلم الأمومة بجانب السبب وراء غيابها عن الوسط الفني خلال الفترة الأخيرة.

تصريحات عنبر

قالت الفنانة عنبر في تصريحات تلفزيونية لها: «مامتي كانت كل حياتي، وفقدت حاجات كتير بعد وفاتها لأنها كانت بالنسبة لي الحب الحقيقي والشيء اللي ميتعوضش وكل حاجة كانت حلوة في وجودها».

واستكملت عنبر كلامها: «وبعد ما راحت.. راحت معاها حاجات كتير أوي أنا ضحيت بـ أمومتي عشان أمي لأنها ضحت بحياتها عشاني وإدتني كتير أوي، دي أقل حاجة أعملها ليها حتى لو على حساب نفسي، ده رزقي في الحياة وأنا راضية بيه».

وأضافت الفنانة عنبر : «والمهم إني مقصرتش في حقها وأنا بنتها الوحيدة وكنت كل حياتها، ولما عملت ده الزمن خدني والشغل أخدني واهتمامي بها لأنها كانت مريضة لعمر من الزمن، مكنش ينفع إني أخلف لأنه كان هياخد من اهتمامي ورعايتي لها، وهي كانت عندي أهم من إني أكون أم».

تصريحات عنبر

أسرار الفنانة عنبر

وتابعت: «ربنا عوضني بحب الناس وأصحابي وجوزي والناس اللي بتحبني، وأكيد كان نفسي أكون أم لأني بحب الأطفال جدًا، ولكن هي كانت أهم من أي طفل في العالم، وأتمنى أن ده ربنا يجعله في ميزان حسناتي ويعوضني خير وكل شيء نصيب».

أشارت الفنانة عنبر إلى أن الغيرة الزائدة قد تسبب الكثير من المشكلات بين الزوجين، مضيفة: «كنا راجعين أنا وزوجي من مشوار بالعربية وواحد عاكسني، وكنا في منطقة مقابر فاضية ومخيفة جدًا جوزي وقف العربية بالعرض في الشارع».

وقالت أيضًا: «ونزل وكان هيعمل كارثة، وخفت يحصل لنا حاجة في المنطقة دي»، وتحدثت عن الغيرة بين الزوجين قائلة: «جميل إن الراجل يغير على الأنثى اللي مرتبط بيها، لكن كل حاجة معتدلة حلوة، لما تزيد عن حدها بيحصل مشاكل».

الفنانة عنبر

وأضافت الفنانة عنبر : «خصوصًا إن مهنتنا صعبة، وكلها مرتبطة بعلاقاتك بالآخرين والتواجد، فلما يكون في غيرة زايدة ممكن تحصل مشاكل ولو أنفع إني أكون فنانة وعندي الموهبة، أهلًا وسهلًا، أي شيء تاني هيضرني برفضه، لأني بحترم ربنا وبحترم نفسي وبحترم أهلي وبحترم زوجي وبحترم كل الناس اللي بتحبني».

وقالت الفنانة: «بحكم التاريخ الطويل بقالي 20 سنة في المهنة وعلاقتي بالجميع كويسة وبكلمهم وعلى تواصل بناس كتير وبكلم المخرجين الجداد ومش بتكسف وبعرفهم بنفسي وده عشان وحشني الفن وعايزة أرجع تاني ورد فعلهم لطيف جدًا وكلهم بيردو بمنتهى الشياكة واللطف والاحترام».

الفنانة عنبر

ووجهت عنبر رسالة للمنتجين، قائلة: «من لا يَرحم لا يُرحم.. فيه زملائي من جيلي قيمة وقامة وتاريخ مشرف وقاعدين في معاناة، إلى أين وإلى متى هيفضل الوضع كدة إحنا عايشين في مجتمع فيه غلاء على الكل وأزمات فحتى لو معاكي هيخلص.. لكل القائمين والمنتجين راعوا الناس اللي قاعدة اللي تعبت عشان تزرع اسمها».

أعمال الفنانة عنبر

نفت الفنانة عنير تقديمها تنازلات، وقالت: «تعرضت لضغوط في بداية المهنة زي أي فنانة بتدخل الوسط واتعاملت معاها بشكل عنيف لأني طالما فنانة وعندي موهبة خلاص أنا بحترم نفسي وأهلي وكل الناس اللي بتحبني والزوج لو في حياتي فعمري ما هعمل ده في سبيل النجومية والشهرة».

وفيما يخص غيرة النجمات من عنبر ، ردت قائلة: «في بداية تاريخي كان مشهد بيني وبينها على طرابيزة سفرة هي ليها كاميرتها وأنا كاميرتي، وقاعدة بصلها قالتي متبصيش كدة بصي الناحية التانية، وأما جه وقت التصوير عملت كدة».

وأضافت: «وبعدها عيطت كتير أوي لأنها المفروض تدعمني وتوجهني وبعدها اشتكيت للمخرج شريف يحيى طلب منها تعتذرلي، وعلى المدى حصلي مواقف مع نجمات تانية زي إنهم عايزيني أغير لبسي أكتر من مرة وأما حسيت فيه حاجة غلط قولتلهم ده لبسي لو مش عجبكم شوفوا واحدة تانية قالولي زي الفل».

ومن أبرز أعمال الفنانة عنبر كان مشاركتها في بطولة «الدخول في الممنوع، وقضاة عظماء، عفاريت عدلي علام، ألف ليلة وليلة، وشطرنج، دنيا جديدة، عفاريت محرز، راجل وست ستات»، وغيرها من الأعمال.

تصريحات عمرو مصطفى: «أعمالي بتعالج البشر.. وأنا اللي بعمل بلوك للناس»

الفنانة حنان يوسف : «كنت عايزة ابقى رقاصة.. ولو كان اتعرض عليا مشاهد بوس كنت هواف بس بقرف»