القصة الكاملة لأزمة ياسمين صبري مع والدها والأخير يرد: «هتاخدي نيشان على خيبتك وفقرك»

تصدرت الفنانة ياسمين صبري تريند محرك البحث على «جوجل» بعد تصريحاتها حول علاقتها بوالدها وأوضحت حقيقة الخلاف بينهما، ورد والدها عليها، ولم تكن تلك المرة الأولى .

شاركت الفنانة ياسمين صبري، في جلسة حوارية على موقع التدوينات الصغيرة «تويتر»، حيث قالت، «أنا كنت عايشة في إسكندرية في أسرة طبقة متوسطة، ومصروفي كان قليل جدا ولو خلص مع نفسي، وكنت عايشة في بيت جدي وجدتي، وفي مرحلة من حياتي كنت في مدرسة حكومية».

وأضافت، «كنت بلعب سباحة وكل يوم بروح التمرين مشي، وأنا ماشية كنت بتخيل إني هيبقى عندي أحلى حاجة في الدنيا، كنت بتخيل حاجة هتحصلي في الحقيقة، وإن هيبقى عندي أحلى جزم وشنط وبيت وعربية، وكل حاجة أحلى، ومكنش في أي حاجة تدل إني هحقق ده، بس كنت بشعر إني أستحق وكنت بحب نفسي».

وتابعت، «مكنتش أعرف إن ده جزء من قانون الجذب، بعد شوية حققت جزء من أحلامي، وبعده جزء، وكل شوية أحلامي بتكبر، الإنسان هو اللي بيصنع مصيره والعالم والواقع اللي عايش فيه، وعشان كده إحنا بنتحاسب في الآخرة، إحنا مخيرين».

وقدمت ياسمين صبري نصيحتها إلى من يتعرض إلى انتقادات من الأشخاص المحيطين، قائلة: «الامتلاء.. معرفة نفسك، تسمعي صوت نفسك (البصيرة) وتحبي نفسك وكأنك طفلة صغيرة هتحميها من كل شر»، وأجابت ياسمين صبري عن سؤال «الفلوس كل حاجه؟»، قائلة: «لا طبعًا مفيش حاجة كل حاجة».

رد والد ياسمين صبري عليها

فيما نشر والد ياسمين صورة لمدرسة ياسمين على حسابه بموقع «فيس بوك»، وكتب عليها معلقًا: «دي المدرسة اللي اتخرجت منها بناتي، اللي واحدة منهم بتدعي أنها كانت في مدارس عربي، وعاشت حياة بائسة فقيرة، وأنها وصلت بمجهودها! هو الكدب في حد يوصل للدرجة دي؟، أنا أفهم الكدب لما تبقى غلبانة، وتكدبي تقول: أنا من عيلة كبيرة، ومدارس أجنبية، وعشت في سرايا، وبابي كان وزير، وهو بيشتغل عامل! يبقى كذب له مبرر! لكن إن واحدة اتولدت لها شغالة فليبينية بتلبس من باريس؛ لأني كنت بأجيب لها لبسها من هناك، ودخلت مدرسة الـEGC، أرقى مدارس الإسكندرية في وقتها».

وأضاف، «عاشت في فيلا بحمام سباحة وصالة جيم، ولها غرفة خاصة بحمامها، وكانت بليدة وطلَّعت تروحي، ويا دوب تنجح بالعافية بخمسين في المية، وكانت بتروح الكلية بالعافية وأصحيها الصبح بالساعة علشان تروح الكلية، وتترفد في السنة مرتين، وعميدة كلية إعلام بيروت موجودة وتشهد .. كنت أروح دايمًا أقدم اعتذارات وشهادات طبية علشان ترجع الكلية وشهاداتها عندي كلها كحك وأبوها دكتور».

وتابع، «تطلع تدعي أنها عاشت حياة بائسة وغلبانة، وبتكمل باقي الشهر من غير فلوس! إيه الكدب والفيلم المتخلف ده؟! انتي عايشة دور تمثيل وارثاه من جد والدتك سيد سليمان.. وبتكدبي ليه؟!. هتاخدي نيشان يعني على خيبتك وفقرك وصلتي وبقيتي حاجة؟! انتي بالنسبة لأبوكي حتة عيلة مش فاهمة بتعملي إيه غير أنك بتشوهي اللي ربَّاكي علشان الناس تصفق لك حتى اخوكي بهدلتيه، اللي طول عمره جنبك وبييجي من آخر الدنيا علشانك! يا شيخة بطَّلي اللي انتي فيه ده، وحسبي الله ونعم الوكيل فيكي.. بطَّلي تجيبي سيرة عيلتكي.. أبوكي اللي ربَّاكي منك لله».

الخلاف الثاني بين ياسمين صبري ووالدها

جاء الخلاف الثاني بين ياسمين ووالدها بسبب عدم حضورها حفل زفاف شقيقها، وأوضحت ياسمين من خلال لقاء تلفزيوني أنها تربت مع جدتها ووالدتها بسبب وقوع الانفصال بين والديها، وقالت :«علاقتي بأمي هي كل حاجة في حياتي هي سافرت وحصل انفصال من وأنا عندي سنتين، مشفتش غير جدي وجدتي»

وأضافت:«جدتي وجدي لمامتي هما اللي ربوني، وجدتي ست شديدة، ومامتي كانت بطلة سباحة وخلوني أتدرب وألعب سباحة من وأنا عندي 4 سنين، مفيش علاقة بوالدي وده مش بسبب الانفصال كل يوم الواحد بيبقى له اختيار وناس بتختار تكمل الطريق وتتحمل المسئولية وفيه ناس بتختار نفسها أو أيًا كان، والانفصال مش معناه العيلة تتفكك بالعكس ده بيبقى اختيار».

هجوم والد ياسيمن صبري

وجاءت توضيحات ياسمين صبري بعد هجوم والدها أشرف صبري عليها من خلال منشور على صفحته عبر فيسبوك ، منذ شهور، معلقًا على عدم حضورها فرح شقيقها وكتب:« فرح ابني بكرة ربنا رزقه بأجمل عروسة، أما إن أمه وإخواته الأشقاء رفضوا حتى يباركوله، فربنا رزقه بأم تانية عملت كل حاجة، وأخوات تانيين لم تغرهم الأموال ولا طيارات وخداع، أصبح لابني إخوات جدد وأم جديدة حفظه الله من الشياطين».

أخر أعمال الفنانة ياسمين صبري مسلسل «فرصة تانية»، وشارك في البطولة كل من أحمد مجدي، نهال عنبر، أيتن عامر، دياب، محمود البزاوي، ومن تأليف مصطفى جمال هاشم، وإخراج مرقس عادل.

ياسمين صبري: «كنت عايشة في بيت جدي .. ومصروفي كان قليل جداً »

ياسمين صبري لجمهورها : الفلوس مش كل حاجة .. وأحضر لمسلسل دنيا بعد رمضان المقبل 

[embed]https://www.youtube.com/watch?v=0U-DuFwRrq8[/embed]