«اللهم لا شماتة».. نجوم الفن يدافعون عن أحمد آدم بسبب قلة العمل

حرص عدد من نجوم الفن على دعم الفنان أحمد آدم، والدفاع عنه، بعد شائعات معاناة الأخير من قلة العمل.

كتب تامر عبدالمنعم في منشور عبر حسابه الرسمي بموقع فيس بوك: «آدم.. قريت مؤخرًا ما يكتب عن النجم أحمد أدم والحقيقة استغربت جدًا لأني واحد من المقربين جدًا منه واتشرفت بالشغل معاه لسنوات سواء في السينما أو في المسرح وشُفت بعيني نجاحه وشُفت بعيني أسلوبه في التعامل مع الصغير قبل الكبير واعرف ثقافة أحمد آدم وبُعد نظره وقرائته للأحداث وتوقعاته اللي علي فكرة كلها تقريبًا ثابت من 2011 لحد النهاردة، أحمد آدم يا سادة لمن لا يعرفه كرامته عزيزة أوي واعتزازه وتصديقه في نفسه وموهبته ملهمش حدود».

تامر عبدالمنعم يدافع عن أحمد آدم

واستكمل: «وعشان كده أنا على يقين أنه لا يمكن يصرح التصريح المتداول بتاع مش لاقي شغل لكن صدقت على طول تصريحه بتاع أنا أحمد آدم برضه.. أنا شخصيًا بقالي 3 سنين بتحايل عليه ينزل مسرح وهو رافض سواء خاص أو عام أو في الخليج.. أنا شخصيًا عرضت عليه مرة واتنين أنتج له مسلسل وهو همه كله الورق، النجوم الكبار أصحاب التاريخ عيب نسييء ليهم كده ونفتري عليهم عشان نشوه صورتهم لمجرد أن كان ليهم مواقف إيجابية مع الدولة ومؤسساتها الوطنية، أحمد آدم مش هيحط عيل في دماغه سنة 2007 عشان قال إفيه باختصار أن اللي اللي عاوز يطلع كادر آدم الكوميدي كان يقول قصاده إفيه!! وبعدين الباشا اللي يستدعي إنه دعا على آدم قي 2007 وكان وقتها ممثل مغمور ييجي 2025 يشمت في آدم وهو بقي مؤلف مغمور برضه دي أكيد الدعوة ضربت في وشه، صديقي وأخي الغالي أحمد آدم لا تلتفت للهيافات واستمر وياريت توافق نعمل مسرح بقى».

بينما كتب الفنان محمد العمروسي عن الفنان أحمد آدم: «البوست ده حتى لا ننسى الفضل بيننا الأستاذ أحمد آدم أستاذ ونجم كبير طاقة فنية وثقافية كبيرة ومن أعلم الفن المصري وله رصيد كبير من الأعمال اللى استمتعنا بيها وليه في رقبتي كلمة حق أنا اشتغلت مع أستاذ أحمد سنة 2005 مسرحية برهومة على مسرح الأستاذ جلال الشرقاوى وقتها كنا ندرس في معهد فنون مسرحية ودكتور جلال هو اللى رشحنا للشغل».

محمد العمروسي يدعم أحمد آدم

وتابع: «لما اشتغلت معاه وكنت حابب إني أضيف حاجة إلى دورى معاه رُحت وقلت له إني عايز أعمل حاجة في الدور وقالي سمعني ولما سمع قالي حلو تعالى نجرّبه النهاردة وفعلا قولنا والناس ضحكت وخدنا تسقيف كبير من الناس فرح وهو على المسرح قالى حلو ده نثبته وفى نفس السنه كنت بعرض معاه وذهبت إلى بني سويف وحصل الحادث الكبير حريق مسرح بني سوف».

بدرية طلبة تدافع عن أحمد آدم

وعلقت الفنانة بدرية طلبة، وكتبت على حسابها الرسمي: «أحمد آدم أعرفه وأنا عندي 17 سنة، اشتغلنا مع بعض، مراته وإسلام ابنه كانوا بيزورونا، ودخلوا بيت أهلي، وتعرفت على مصطفى – الله يرحمه – عندهم في الفريق المسرحي لشركة ستيا.. كانوا زملاء عمل وفن، واشتغلت معاه بطولة فيلم القرموطي في أرض النار، لسه واخدة بالي من اللي على السوشيال ميديا، وعرفت ليه الناس ربطت البوست بأحمد آدم.. استحالة أشمت في عشرة عمر، مش زميل عمل وبس.. أنا كاتبة البوست ده لأني فعلًا بستغرب من النوعية دي من البشر.. كلامي كان عام وواضح».

واختتمت: «أحمد آدم لو عمل فيا إيه برضه عمري ما أفكر أكتب كلمة تجرحه هو أو غيره من أصحابي وزمايلي.. إلا طبعًا أبو باروكة، قريب هطلع لايف أحكيلكم عنه».