«بحلم أدخل كلية تجارة والحمدلله إني ماشية على رجلي».. حبيبة عروس حادث الإقليمي تتحدث بعد تحسن حالتها

من داخل أحد مستشفيات محافظة المنوفية، روت الطالبة "حبيبة محمد"، إحدى الناجيات من حادث طريق الإقليمي المأساوي، تفاصيل ما جرى لها ولصديقاتها، مؤكدة أن الحادث أودى بحياة 18 فتاة، بينما نجت هي وأخريات بأعجوبة.

«أنا يا جماعة لسه مش مصدّقة إن ربنا نجّاني، يوم الحادث كنا راجعين من الشغل في المصنع، إحنا 21 بنت في ميكروباص، ماشيين في حارتنا عادي. فجأة تريلا طلعت قدّامنا قطعت الطريق، الميكروباص اتقلب واتعجن حرفيًا، لقيت نفسي مرمية على الأرض والدم في وشي وإيديا، أول حاجة عملتها قلت: يا رب استرها!».

تضيف حبيبة: «18 صاحبة لينا راحوا في ثانية، وأنا وإسراء وآيات طلعنا من بين الحديد، الناس فكرونا ميتين، الإسعاف أخدتنا مستشفى أشمون العام، بس بصراحة المستشفى هناك ما كانتش مجهزة، قعدنا نلف على أمبولات وأدوية لحد ما جابونا هنا مستشفى المنوفية».

وتكمل وهي تبتسم رغم الألم: «الدكتور مصطفى هنا عامل معانا كل شيء كويس، بيهزر معانا ويجيب لنا المشبّك من طنطا، حسيت أني بين أهلي مش في مستشفى، أيدي لسه متجبسة ووشي مخيط، بس الحمد لله بمشي على رجلي، أكتر حاجة وجعاني إن نتيجة الدبلوم لسه ما ظهرتش، كنت بحلم أدخل كلية تجارة، وهكمل إن شاء الله».

وتؤكد: «أنا كل يوم أنزل أتطمن على إسراء، الناجية الثانية، شالوا لها الطحال وعندها كسور،  وآيات الناجية الثالثة برضه بدأت تتحسن، دعوات الناس وصلانا من كل حتة، من الأردن للسعودية للمنوفية، بجد حسينا بمحبة كبيرة».

وتختتم حبيبة: «اللي شوفته يخليني أقول لكل سواق نقل: ارحمونا.. حياتنا مش لعبة، وربنا يرحم اللي راحوا، ويصبر أهاليهم».