بعد حصدها 7 جوائز.. منة عدلي القيعي تروي رحلة علاج صعبة ونجاتها من الموت

أعربت الشاعرة الغنائية منة عدلي القيعي عن سعادتها، بحصدها 7 جوائز عن أغانيها الفترة الماضية وفي شهر رمضان 2025.

نشرت منة عدلي القيعي صورة لها مع الجوائز، عبر حسابها الرسمي بموقع انستجرام، معلقة: «بوست طويل.. وحكاية مكنتش ناوية أحكيها.. بس هحكيها.. من 7 شهور وإحنا لسة بنسخن عشان نحضر لشغل رمضان حسيت بصعوبة في التنفس كانت بتزيد كل يوم إلى أن تحول الموضوع لنوبات اختناق تقريبًا».

أزمة منة عدلي القيعي

وتابعت: «كانت بتتسبب في تسارع في ضربات القلب توصل لـ 180 إلى 190 وأوقات كتير الموضوع كان بيطول كنت بحس إني مش هعديها.. بعد شهر واتنين من الفحوصات والتشخيصات المختلفة جالي نوبة من دول وأنا سايقة وتسببت في حادثة كانت صعبة شوية، راحت فيها عربيتي».

واستكملت منة عدلي القيعي: «والحمدلله برضه نجوت منها بإصابات خفيفة وكنا بنحمد ربنا ألف حمد.. بعدها الأمور تدهورت أكتر، والنوبات كانت بتوصل لمرتين و3 و5 في اليوم الواحد.. فيه أيام كنت بوقف عربيات ناس معرفهاش في الشارع وأقولهم خليكوا معايا من الخوف.. وابتديت رحلة علاج طبيعي للتنفس وكنت حرفيًا بتعلم إزاي اتنفس من الأول».

تصريحات منة عدلي القيعي

وأضافت: «واليوم اللي كنت بتنفس فيه صح لدقيقة متواصل كنت بعيط من الفرحة.. ويوم بيعدي ويوم أحس أنه مابيعديش لحد ما وصلنا لهنا.. الـ 7 شهور دول هما اللي ربنا كرمني فيهم بالأغاني دي.. صاحبي يا صاحبي وكل سنة وتقابل حبيب وإلى آخره من الشغل اللي اتعرض في رمضان 2025.. أغاني منهم اللي اتكتبت وأنا في مستشفى واللي اتكتبت وأنا على جهاز تنفس واللي اتكتبت وأنا بعيط».

وكتبت منة عدلي القيعي: «فيه أيام من الإحباط كنت بفكر أبطل أحاول أخف.. بس عمري ما فكرت أبطل كتابة.. وكنت بدعي ربنا يكرمني ويجازيني وكنت بكلمه وأقوله يارب وقفني ووقفني على رجلي تاني.. اللهم لك ألف حمد وشكر».

واختتمت: «7 جوايز حصيلة 7 شهور مروا بكرم الله ولطفه.. (فيه جايزتين مش معايا).. شكرًا لأهلي وعيلتي وجوزي وصحابي والناس اللي اشتغلت معاهم كلهم.. طلعت عنيكوا وقلقتكوا وعملتلكوا إزعاج واستحملتوني.. شكرًا من كل قلبي».

 

View this post on Instagram

 

A post shared by Menna el kiey منة القيعي (@mennaelkiey)