«بعد سنتين من الشغل والتعب والتأجيلات».. انتهاء تصوير مسلسل 220 يوم

أعلن المخرج كريم العدل انتهاء تصوير مسلسل 220 يوم، بطولة الفنان كريم فهمي والفنانة صبا مبارك.

كتب كريم العدل في منشور عبر حسابه الرسمي بموقع فيس بوك: «فركش 220 يوم.. بعد سنتين من الشغل، التعب، التأجيلات، و النقاشات اللي مابتخلصش، النهاردة أخيرًا قولنا فركش مسلسل 220 يوم».

انتهاء تصوير مسلسل 220 يوم

وتابع: «رحلة طويلة بدأناها من 2023… حابب أشكر من قلبي كل قسم في الكرو العظيم ده، لأن كل واحد فيكم كان حجر أساس في المسلسل ده.. ‎كنتم العمود الفقري لأي لحظة حقيقية في المسلسل.. شكرًا على إنكم حميتوا الرؤية، و على كل لحظة تعبنا فيها وقلنا ناخدها تاني عشان نوصل للأحسن… شكرًا على كل تفصيلة صغيرة أو كبيرة أضافتوها للمسلسل.. بحبكم بجد».

واستكمل كريم العدل: «‎شكرًا أستاذ محمود زهران على القصة الحلوة الناعمة اللي كلها مشاعر وأحاسيس.. شكرًا سمر بهجت ونادين نادر على مشاهدكم وحواركم.. ‎شكرًا ليكم على الصبر، على إعادة الصياغات.. والـdrafts الكتير قوي.. شكرًا إنكم فضلتوا تدوروا على الحقيقة جوه كل مشهد.. انتوا اللي خليتوا الشخصيات تنبض بالحياة.. ‎شكرًا من قلبي على كل لقطة وكل لمبة وعدسة، وكل حاجة.. خلتونا نشوف القصة بشكل أجمل وأعمق وأنعم.. شكرًا على كل كادر معمول بحب، وكل حركة كاميرا مخلية المشهد يقول اللي مش مكتوب».

تصريحات كريم العدل عن مسلسل 220 يوم

وأضاف: «أنتم اللي صنعتوا العالم اللي عشنا فيه.. كل تفصيلة صغيرة كانت بتكمل الصورة.. شكرًا على خيالكم، ودقتكم، وحرصكم على إن كل حاجة تحكي الحكاية من غير كلام.. ‎شكرًا علشان خليتوا المشاهد تتنفس، وانتوا اللي أضفتوا إحساس لكل لحظة.. شكرًا على أذنكم الدقيقة، و على السحر اللي بتحطوه ومايبانش.. ‎الجنود اللي دايمًا في الظل، بس من غيرهم كل ده مكنش هيحصل.. شكرًا على التنظيم، والمتابعة، والمرونة، وعلى إنكم فضلتوا مؤمنين بالمشروع رغم كل التحديات.. شكرًا لكل الكاست و كل الممثلين والممثلات، من أكبر واحد لأصغر واحد».

وكتب كريم العدل أيضًا: «أنتم اللي نفختم الروح في السيناريو.. كل لحظة صدق، كل دمعة، كل ضحكة، كانت نابعة من إحساسكم الحقيقي، ومن حبكم للشخصيات و للحدوتة.. ‎شكر خاص للشركة المنتجة اللي كانت السند الحقيقي في رحلة تنفيذ المسلسل ده.. من أول لحظة، كان فيه دعم كامل، ثقة، و إيمان بالمشروع و بالرؤية الفنية من غير تردد».

واختتم مخرج مسلسل 220 يوم: «‎المسلسل ده ماكانش هيشوف النور من غير وجودكم في ظهرنا، ولا كان هيتنفذ بالحب والإخلاص اللي اشتغلنا بيهم كلنا ‎وأخيرًا.. ‎لكل شخص شارك في المسلسل ده، ولو حتى بدعوة من قلبه، شكرًا.. يارب المسلسل يعجبكم، وأتمنى إني ماخيبش ظنكم في الآخر بعد كل التعب والمجهود ده.. شكرًا من قلبي».