بعد طرح البوستر الرسمي.. كواليس رحلة فيلم في عز الضهر على مدار 5 سنوات

أعلن الفنان والسيناريست كريم سرور موعد عرض فيلم في عز الضهر، كما كشف كواليس عن العمل.

نشر كريم سرور البوستر الرسمي لفيلم في عز الضهر، عبر حسابه الرسمي بموقع فيس بوك.

البوستر الرسمي لفيلم في عز الضهر

وعلق على صورة البوستر: «تنبيه هام الفيلم ده لا فيه بلطجي بيخمس بموتوسكيل ولا فيه واحد بينتقم من صاحبه عشان باعه في قعدة ضرب ولا اتنين بيحبوا بعض ولازم يطلقوا عشان مش عارفين يتجوزوا».

وتابع كريم سرور: «فيلم فيه فكرة حاولنا على قد ما نقدر نقدمها بأفضل صورة، فكرة تناسب عقلية أى بني آدم عايش على الكوكب ده (مش المصريين أو العرب بس) فأتمنى الفكرة توصلكم وتحبوها زى ما حبينا نحترم عقلية المشاهد ونقدم سينما جديدة ومختلفة ومش بقول كدة لأنه فيلمي بس بقول كدة لأني اتمنيت طول عمرى اتفرج على فيلم مصري يخاطب الإنسان في المطلق مش يخاطب الفرد بعينه».

تصريحات كريم سرور عن فيلم في عز الضهر

واستكمل: «وفي نفس الوقت ميكونش مستقل ومتفرد بعناصر وطريقة سرد مستقلة.. لأ يبقى فيلم تجاري عادي هدفه التسلية والإمتاع ونضيف عليه الإشباع.. التسلية من الدراما، والإمتاع البصري في الأكشن والديكورات ومواقع التصوير حول العالم والإشباع من الفكرة».

وأضاف كريم سرور مؤلف فيلم في عز الضهر: «‎فالحمدلله آخيرًا ورسميًا المارد خرج من القمقم بعد خمس سنين ونتمنى بجد نكون عند حسن ظنكم ونبقى قدمنا حالة جديدة ومختلفة عن السائد مع كامل احترامي ومحبتي وإعجابي بكل ما يقدم في السينما في كل أنواع الأفلام المقدمة للمشاهد العربي ومشكور كل مجهودات كل القائمين في الصناعة على تقديم محتوى غني ورؤى ‎خاصة تتناسب مع كل فئات الجمهور».

واختتم: «بس إحنا حابين نقولكم جايبين فيلم مختلف، وبقول تاني يارب يعجبكم وتحبوا النوع ده وتطلبوا منه تاني.. لينا لقاء قريب يوم 18/6 في كل سينمات مصر والوطن العربي.. ‎نشوفكم على خير».