بعد نجاحه.. محمد دياب: «مسلسل أشغال شقة معظم ممثلين مصر رفضوه»

تحدث المخرج محمد دياب، عن كواليس تصوير مسلسل 'أشغال شقة' بجزئيه الأول والثاني بعد النجاح الكبير الذي حققه المسلسل في جزئه الأول في موسم رمضان الماضي، وبعد عرض 5 حلقات من مسلسل 'أشغال شقة جدًا' الجزء الثاني.

وكشف محمد دياب، عن معاناة شقيقه المخرج خالد دياب وشقيقته المؤلفة شيرين دياب، أثناء البحث عن جهة إنتاج لخروج مسلسل 'أشغال شقة' للنور، مشيرًا إلى أن أغلب نجوم الفن المصري رفضوا المشاركة في العمل.

وكتب محمد دياب، عبر صفحته الرسمية على موقع فيس بوك، قائلاً: 'الحمد لله أشغال شقة للسنة التانية ينجح نجاح ساحق، بس ورا النجاح ده قصة'.

وأضاف محمد دياب قائلاً: 'أشغال شقة ده لمدة خمس سنين بيتعرض على منتجين مصر كلهم و لكن مكانش فيه حماس ليه، تقريبًا معظم ممثلين مصر رفضوه رجالة وستات.. ولما مرة نجم كبير تحمسله و مضاه فضل يطلب تغييرات لدرجة أنه في الآخر طلب إن شغل البطل يتغير و تتشال فكرة الشغالات!'.

وتابع محمد دياب، قائلاً: 'في ناس مكانتش عاجباها الفكرة وناس كانت شايفه إننا بنكتب جد فمش هنعرف نعمل كوميدي، وناس عايزة الفكرة بس اللي يخرجها حد تاني غير خالد'.

واستكمل محمد دياب حديثه، قائلاً: 'رد الفعل ده كان هيجنن خالد وشيرين، إحساس صعب لما تبقي مؤمن بحاجة واللي حواليك مش شايفنها، ساعات ده بيشككك في نفسك.. أربع سنين تعدي و مينزلش لخالد و شيرين أي مشروع، الضغط خلي خالد يقبل إن أشغال شقة يتعمل ولو بمخرج تاني.. خالد لأي حد يعرفه هو أكثر إنسان كوميدي تقدر تعرفه و أنا وشيرين كان عندنا قناعة أنه من أشغال شقة هيطلع كوميديته الخاصة اللي هتكسر الدنيا'.

وأضاف محمد دياب، قائلاً: 'بصعوبة شديدة رجع خالد وشيرين يحاولوا ورا المسلسل، لغاية لما جه هشام ماجد اللي آمن بيه وبخالد كمخرج و جت شركة الإنتاج (أي برودسيرز) اللي هيأتله أسباب النجاح'.

وأختتم محمد دياب، حديثه عن مسلسل 'أشغال شقة' قائلاً: 'أشغال شقه نجح و استخدم توليفة كتابيه مختلفة مش قايمة عالإيفيهات، وخالد كمخرج طلع عنده صوت وشخصية رؤية بصرية باينه في كل مشهد.. أنا طول عمري بتفرج علي كوميديا المسلسلات وابتسم كام مرة وابقي مرضي، بس إن الواحد يضحك بصوت ولغاية لما بطنه توجعه وده يحصل كل حلقه، فمتخيلتهاش تحصل في مسلسل .. بالنسبالي المخرج والمؤلف الشاطرين هما اللي بيعملوا حاجه احس اني معرفش اعملها وأنا لما بتفرج على أشغال شقة ببقي متأكد إني معرفش أعمل منه مشهد.. فعلاً كل تأخيرة و فيها خيرة'.