بعد 10 أيام من وفاته.. شقيق مصطفى درويش يروي موقفا مؤثرا له

ياسمين حمادة 10 مايو 2023 | 03:46 مساءً

روى هاني درويش شقيق مصطفى درويش موقفا لا ينسى له، وبالأخص قبل حوالي 3 سنوات، قبل شهر من انتشار فيروس كورونا.

شقيق مصطفى درويش

كتب شقيق مصطفى درويش في منشور عبر صفحته الشخصية بموقع فيس بوك: «منقول.. هفضل أفتكر الحدث ده وأحكي عنه لسنين.. من 3 سنين وبالتحديد قبل فتره كورونا بشهر جه يوم الأرصاد قالت إن هيبقى فيه عاصفه رعدية وأمطار

في الفتره دي».

وتابع: «كنت شغال مع الله يرحمه مصطفى درويش في المطعم والكافيه بتاعه في المهندسين، مصطفي واللي معروف عنه عمل الخير ومساعدة الناس واللي بالمناسبة بعتبره سبب أساسي في نجوميته وحب الناس والقبول اللي ربنا زرعه فيه وده بسبب الخير اللي عمله والناس اللي سترها».

موقف لا ينسى لـ مصطفى درويش

واستكمل: «المهم مصطفى كتب عنده عالفيس بوست إنه فاتح المطعم أثناء يومين العاصفة دي لأي حد مشرد أو مالوش مأَوى وطلب من أي حد يشوف شحات أو مشرد في الشارع يطلبله تاكسي لحد الكافيه وإحنا هنحاسب.. وبالفعل حصلت العاصفه وأول مره في حياتي أشوف كميه الأمطار دي.. أنا ساكن في مدينه نصر والكافيه في المهندسين يعني قدامي مهمه مستحيله إني اسيب مراتي لوحدها في عز الجو ده وأنزل أروح الكافيه».

وكتب هاني درويش شقيق مصطفى درويش أيضًا: «وألاقي مواصلات توديني علشان أكون موجود، واستقبل الناس اللي من المتوقع تيجي وتبات في الكافيه، وبالفعل اتشعلقت في باص 66 اللي بيعدي على سفنكس جنب نادي الزمالك واتمشيت للكافيه واتغرقت في المطر وكل اللي كانوا شغالين في الكافيه الوقت ده كانوا رجالة وحضروا بالقوة كلها وكمان أنا وغيري جبنا معانا لبس شتوي كتير للناس المتوقع تيجي».

شقيق مصطفى درويش

مواقف مصطفى درويش

وتابع: «روحنا الكافيه لاقينا مصطفى أول واحد وصل هناك ومعاه بطاطين وجمعنا واتكلم معانا وقالنا الناس اللي جايه تتضايف كويس زيها زي الجيست أكل وشرب ويباتوا كمان وكل اللي عاوزينه هاتوه.. وقاللي أنت هتبات النهاردة مع الناس دي في الكافيه.. أنا عارف إنك بتحب الخير وأكتر واحد هتخلي بالك منهم.. وبالفعل جالنا ناس كتير مشردين ويمكن ساعدنا ونقل حالات كتير بعربيته شخص محترم جدًا ربنا يباركله.. مسكت التليفون اللي حطه مصطفى على صفحته واستقبلت كم اتصالات من داخل وخارج مصر ناس بتشكره على المبادرة وبتدعيله وناس عايزه تساعد والله استقبلت فوق الـ 200 مكالمه ده غير القنوات».

واستكمل شقيق مصطفى درويش في منشوره: «قابلت الناس اللي جت وغديناهم أحسن أكل وكل حاجه محتاجينها جت وأخدوا شاور في حمام المطعم ولبسوا لبس نضيف واتدفوا وحملتلهم أفلام عربي جديدة فضلوا يتفرجوا عليها لحد الصبح وهما فرحانين جدًا وأنا قاعد جنبهم.. وقعدت أتكلم معاهم فيهم اللي هربان من أهله وفيهم المريض النفسي وفيهم ناس كبيره ولادها راميينها في الشارع وفيهم ناس كانت جايه في شغل من محافظه تانية ومعرفتش تروح ومعندهاش حد تبات عنده في القاهرة».

واختتم: «أكتر حاجة مؤثرة إن من بين الشباب اللي جت شاب مشرد كان جاي شبه ميت.. طلبناله الإسعاف وجت مرضيتش تاخده والدكتور كتبله علاج لكن للأسف الصبح توفاه الله.. ربنا أراد إنه يتستر في آخر يوم له في الدنيا ويلبس لبس نضيف ويأكل أكل نضيف ويموت ويلاقي ناس تدعيله بالرحمة وتصلي عليه وتدفنه كمان.. اليوم ده عمري ما هنساه وربنا يجعله سبب في دخولك الجنة يا مصطفى لأنك سترت ناس مشردة في الشارع... حبيبي يا مصطفى عمري ما هنساك أبدًا».

مشهد وفاة مصطفى درويش