بهاء الدين محمد يتراجع عن اعتزاله ويكشف سبب القرار المفاجئ

أعلن الشاعر الغنائي الكبير بهاء الدين محمد، اليوم الخميس، تراجعه عن الاعتزال.

وقال بهاء الدين محمد عبر حسابه على موقع التواصل الاجتماعي فيسوبك «مهما توقعت أو حسيت أو تخيلت مش هعرف أوصف إحساسى بكلام يرد بكل إحترام على رد فعلكم وفعل زمايلى الفنانين اللى رافضين قرار إعتزالى والتركيز فقط على تأملات فى نِعم الله ، رد الفعل اللى رافض القرار خلانى أسكت وأفهم وأعرف وأشوف بصوره واضحه مدى الحب والتقدير اللى وصلنى من كل مكان وعرفت من خلاله إن ليا مكان ف قلوب من حقهم الرفض».

سبب اعتزال بهاء الدين محمد

وتابع بهاء الدين محمد «رد الفعل اللى رافض الإعتزال خلانى أتجاوز اللحظه اللى خليتنى أفكر في القرار ، كانت لحظة سخيفة اتجمعت فيها أحداث كتيرة مش حلوة ونفوس وقلوب كلها حقد وسواد وغباء في الحياة الفنية والشخصية.وكم كبير من ضعف وطمع ناس مش ناس».

وواصل بهاء الدين محمد «حسيت إنى محتاج هدوء، محتاج أعيش لنفسى ومع نفسى بعيد عن أى ظروف تجبرنى على الاحتكاك أو معاملة المرفوضة دينا وحياة وأخلاق»، مضيفا «كانت لحظة تقيله على القلب ولكن إكتفيت بالتخلص نهائى من الأصناف دى اللى بتقصد تتسبب  أى ضرر وإبتزاز بكل شر وطمع وإستنزاف للإنسانية اللى ربنا خلقنى بيها حتى لو كنت بأعاملهم بكل خير وماخدوش بالهم إن الطيبة اللى جوايه طيبة من قوتى ورحمتى، وخاصة لما ألاقى اللى بيتعامل معايا ضعيف وناقص ، لذلك قررت شطب وإستئصال كل حد لا يليق ومرفوض ، واحتفظت فقط بالناس اللى قلوبهم ونيتهم سليمة في الفن والحية».

ووجه بهاء الدين محمد رسالة إلى جمهوره الذي حرص على دعمه ورفض اعتزاله قائلا «شكرا على هذا الحب والاحترام اللى يارب أفضل قده وأرد عليه بكل فن ، وأشكر كل قلب كتبلى أو بعتلى أو كلمنى يطمن عليا وإعتبرته شاركنى ووقف معايا بكل حب ف التجربه دى ».

وأكد بهاء الدين محمد أنه لم يتخذ قرار الاعتزال بحثا على التريند قائلا «مهم جدا أقول أنا مش بتاع ترندات ولا ظهور إعلامى بالعكس من سنين واخد قرار أعيش ف حالى بعيدا عن الأضواء وأسيب أعمالى فقط ف دايرة الضوء ويكفينى إن كلماتى تعيش وتفضل ناجحه وف قلوبكم، شكرا من قلبى يا أغلى الناس».

وكان بهاء الدين محمد، قد اتخذ قرار اعتزاله منذ أسبوع بشكل مفاجئ، ما دفع جمهوره والعديد من نجوم الوسط الفني إلى دعمه وإعلان رفضهم اعتزاله مهما كانت الظروف التي يمر بها، باعتباره أحد أعمدة الشعر الغنائي، في العالم العربي.