وجه المؤلف والكاتب تامر حبيب، رسالة لأسرة وصناع مسلسل كامل العدد للنجمة دينا الشربيني الذي عرض في النصف الأول من شهر رمضان 2023 وانتهت حلقاته الـ 15 بنهاية سعيدة .

تامر حبيب: رنا أبو الريش ويسر طاهر دول بناتي

وكتب تامر حبيب، عبر حسابه الشخصي على موقع التواصل الإجتماعي إنستجرام: برضو الشهادة هتبقى مجروحة وأنا بتكلم عن (كامل العدد) علشان رنا ابو الريش ويسر طاهر دول بناتي، اختاروا نوعية وحدوتة وعلاقات واحداث خفيفة، ايقنوا اننا كلنا فينا اللي مكفينا من اول ما نصحي لغاية ما ننام.

وتابع تامر حبيب: كان عندهم الجرأة و المجازفة في انهم يختاروا تيمة فيلم من الافلام اللي كلنا حافظينها و يعملولها معالجة مودرن مع انهم يذكروا في التتر ان مسلسلهم مستوحي من (عالم عيال عيال)، و معالجة ذكية ومتكلمة في مشاكل حقيقية وكبيرة و تناولوها بخفة ظل مناسبة للنوعية اللي مقدمين بيها معالجتهم، ماحصلش و لا مرة ادعاء او جعلصة. بالعكس، كتبوا عالم عيالهم هما الشخصي، من مشاهدات وعلاقات شافوها وعاشوها هما بنفسهم، وعشان كده المشاهد طلعت حياتية سلسة.

تامر حبيب يوجه رسالة للمخرج خالد الحلفاوي

واستكمل تامر: وجه الجميل خالد الحلفاوي ببساطته وتعامل مع ورق بناتي من غير اي فذلكة ، لتخرج المشاهد من تحت ايده زي كوباية المية، تروي عطشنا لشوية بهجة؛ اما عن العيال، ولاد دينا وشريف، فأنا بجد بأحيي اختيار خالد لكل واحد فيهم بدون استثناء وشغله علي آدائهم والهارموني بينهم، و ده مش سهل علي فكرة.

تامر حبيب يتحدث عن ابن دينا وبنت شريف سلامة في كامل العدد

وتابع حبيب متحدثا عن كامل العدد : واسمحولي أخص بالذكر ابن دينا الكبير وبنت شريف الصغيرة، انا اهو و انتوا اهو، افتكروا ان الشاب الجميل اللي عمل ابن دينا ده لو فضل مركز و طبيعي و ذكي هايبقي ممثل مهم علشان الراجل ده موهوب بجد و بيجبرك تصدقه وتركز معاه. وظهور بدرة في اي مشهد كان بيبهجني. مصطفي درويش كان بالنسبة لي برضه مفاجأة سارة ومنعشة، طبيعي ومصدق جداً وعامل الشخصية بآداء كوميدي وحقيقي، مشاهد دينا مع الاولاد كلهم كانت جميلة ورايقة، بالذات لما تكون فيه مشكلة بجد، زي مشهد المواجهة بينها وبين بنتها لما عرفت انها عايزة تتجوز (البنت دي كمان كويسة جداً وبالذات في المشهد ده)، تركيبة علاقات العيلتين والمواقف بينهم و تطور علاقاتهم بعيد عن كليشيهات زوجة الاب اللي بتعذب عياله، و زوج الام القاسي عديم القلب، ولا الحما اللي ابشع من العما، ولا المطلقين اللي مشحططين بعض في المحاكم.

وأضاف تامر حبيب:  حسستني ان الدنيا لسة بخير، و ان لسة ينفع نشوف علاقات في الدراما عادية من غير جرايم ولا عفاريت، ينفع نشوف ناس بيتكلموا و يسمعوا بعض من غير ردح و صريخ واستعارات ملوية.. ناس لما كانوا يتجمعوا في بيت الجد المريح للاعصاب و يتغدوا ،يلعبوا و يقربوا من بعض، لأ قال و بدرة ترقصلهم و ترقصهم كمان ،حسيت اني عايز اقضي معاهم اليوم الحلو ده، يا جماعة المرة الجاية انا راشق، اعزموني معاكم، و ماتقوقوليش.. كامل العدد.3.

مواعيد الحلقة الأولى من مسلسل كامل العدد

أحداث الحلقة 10 مسلسل كامل العدد.. هل تترك دينا الشربيني زوجها بسبب الخيانة؟

ابنة صلاح جاهين تهاجم صناع مسلسل كامل العدد: عيب يستغلوا شغل والدي