تامر حبيب يكشف كواليس أزمة منة شلبي: أسود أيام حياتي.. ولما أموت اعملوا حفلة

ياسمين حمادة 15 ابريل 2023 | 08:10 مساءً

كشف السيناريست تفاصيل مكالمته للفنانة منة شلبي في أزمتها الأخيرة، معلقًا: «كان من أسود أيام حياتي لغاية ما عرفت إنها في طريقها للبيت».

تصريحات تامر حبيب

قال تامر حبيب عن أزمة منة شلبي في تصريحات تلفزيونية له: «خدتها في حضني جدًا وكان همي إنها تضحك وتنبسط وأعمل أراجوز عشان تضحك وكان في قسوة من البشر».

واستكمل قائلًا: «الناس بقت تحكم على كل حاجة مفيش أكتر من عزاء أمي والناس القريبة مني كانوا بيحضونني ويبوسني، وقالوا بنرتكب معصية وده موت معصية إيه اللي نرتكبها».

تامر حبيب

تامر حبيب ووالدته

وتحدث تامر حبيب عن والدته، موضحًا أنه لم يستوعب حتى الآن وفاتها حتى بعد وفاتها بـ 5 سنوات، وقال: «مش عارف أعبر عن إحساسي وحتى الآن تأتي لحظة أنسى أنها توفيت».

وأضاف: «وأول مرة انسى ذكرى وفاة أمي كان السنة دي وكنت مرتاح شوية لأني قلت إن محتاج الحياة تمشي وكانت أمي علطول توصيني لما أسافر أول لما أوصل اطمئنها عليا وكنت بنسى علطول أول لما اسافر».

تامر حبيب والصلاة

وتابع السيناريست تامر حبيب: «وكلمتني مرة واثنين وبعدين قلت لها أنا في بيت حلو قوي وفي جنينة حلو قوي فقالت لي يارب من بيت حلو لبيت أحلى ومن جنينة حلوة لجنينة أحلى ومن جو حلو لأحلى ولما توفيت أيقنت أنها كانت بتقولي رايحة فين».

واختتم تامر حبيب حديثه: «أنا رجعت أصلي لأني كان بقالي شوية مش بصلي ورجعت أصلي من أول رمضان ومنتظم في الصلاة وصورتها في اتجاه القبلة وبحس كأننا بنصلى جماعة».

انتقادات ضد تامر حبيب

وفيما يخص انتقاده بسبب حضوره حفل زفاف في الجونة يوم وفاة الفنان سمير غانم، علق: «الله يرحم سمير غانم لو كان العكس كان ممكن يعمل كده وكان بيموت في البهجة، وأنا كنت في فرح في الجونة وللأسف الشديد كنت هحضر الصبح الجنازة وأرجع على الفرح بالليل».

واستكمل: «يوم لما أموت اللي بيحبوني كلهم يعملوا حفلة كبيرة على سيرتي ويشغلوا الأغاني اللي بحبها ويفتكروا المواقف اللي بتضحك ويرقصوا وينبسطوا وهكون أكثر واحد مبسوط، وفكرة أني رحت الفرح مش معناه أني متوجعتش على فراق سمير غانم وكان في علاقة بينا علاقة حب شديدة وكان صديقي ونلت شرف أني اشتغل معاه في شربات لوز».

تامر حبيب