تامر حسني بعد اعتزال محمد سامي للدراما: المخرج الوحيد في مصر اللي مفشلش

حرص الفنان تامر حسني على دعم المخرج محمد سامي، بعد إعلان اعتزاله الدراما التلفزيونية.

علق تامر حسني على منشور اعتزال محمد سامي، عبر موقع فيس بوك، قائلًا: «إوعى تكون عايز تبعد عشان أي إحباط جايز يكون فعلاً في بعض المشاهد اللي الناس انتقدتها وأنا شخصيًا استغربتها شوية وقولت جوايا أنك مش محتاج تعملها أصلاً لأن عندك الحقيقي والأهم بس على رأيك الفنون جنون أحيانًا».

تامر حسني يدعم المخرج محمد سامي

وتابع: «فكرة مجنونة تنال الإعجاب وفكره لأ.. بس ده ميخليناش ننسى إنها بعض مشاهد مش بعض أعمال لأنك بالفعل المخرج الوحيد في تاريخ مصر اللي مفشلش ولا مرة ويمكن الحظ محالفكش أوي في عمل ولا 2 على مدار 14 سنة ودي حاجه مينفعش الجمهور ينساهالك أنت قدمت مسلسل آدم اللي جمع كل المصريين وكل الوطن العربي يتفرجوا عليه زي ماتشات الكورة بسبب أنه أتكلم عن قضية تخص كل الوطن وكان بداية لصورة جديدة أول مرة كانت بتتقدم في مصر».

واستكمل تامر حسني: «وبعدها سبق الإصرار وحكاية حياة اللي كانوا نقلة كبيرة في ديكورات الدراما المصرية وبعدين الأسطورة والبرنس وجعفر العمدة اللي حققوا نجاحات ساحقة وكانوا أعلى نسبة مشاهدات في الدراما بشكل عام وبعدهم نعمة الأفوكاتو وإش إش وسيد الناس اللي برضو كل واحد فيهم يا أعلى مشاهدة يا تاني أعلى مشاهدة.. هزعل منك لو هتمشي محبط وأنت أنجح حد.. الشجرة الخضراء الجميلة ساعات بيطلعلها ورق أصفر بسيط عادي بيتقص وبتفضل شجرة كبيرة وجميلة وده التطوير الطبيعي للبني آدم واللي بيمر بيه أي ناجح بيطور وعنده شخصية بدليل مسلسلاتك بيتقال عليها مسلسلات محمد سامي وتركيز الناس معاك دليل على حبهم لأعمالك».

اعتزال المخرج محمد سامي

وأضاف: «ورغم إن بعضهم بينتقدوها بس متابعينها حرف حرف ونقدهم ليك بيبقى على قد حجمك وهي دي ضريبة الناجحين الكبار.. سافر وكمل حلمك وأنت منتصر بتاريخك وإوعى تُحبط وأنا عارف إن محمد سامي اللي اكتشفته أنا وقدمته للصناعة وهو عنده 27 سنة لا يمكن هيتهز ممكن يزعل يومين ويراجع نفسه في مشاهد أنا مبسوط منك أنك بمنتهى الشجاعة الأدبية اعتذرت على تقديمها خد راحة شوية وارجع أقوى من الأول».

واختتم تامر حسني رسالته لدعم المخرج محمد سامي: «وأنا واثق من اللي هتسافر عشانه أنه قرار هيضيف نقلة كبيرة لمشوارك.. إوعى تخلي الزعل من بعض المشاهد ينسيك أنت قدمت إيه للدراما ياريت قبل ما نقسوا على سامي بالطريقة دي نفتكر هو أمتعنا سنين قد إيه بمسلسلاته وأنا ذكرتها كلها عشان لو حد ناسي أفكره وعشان لو هو محبط يجمد تاني ربنا ينور طريقك وترجع أقوى وأقوى من أي وقت واثق فيك يا حبيبي.. وأنا هفضل أخوك الكبير وفي ضهرك إن شاء الله طول العمر يا بطل».