تامر حسني: شوفت معجزة بسبب سورة يّس.. خلوها عادة في حياتكم

وجه النجم تامر حسني رسالة مؤثرة لجمهوره، حكى فيها عن موقف كبير حصل قدامه وشاف فيه تجلّي رحمة ربنا بشكل معجز، ونصح كل اللي عنده حلم أو أُمنية حاسس إنها مستحيلة، إنه يقرأ سورة يس.

وكتب تامر على حسابه في فيسبوك: "حصل قدامي موقف مش مصدق عظمته، وواقف قدامه عاجز الفكر من عظمة رحمة ربنا، الموقف ده خاص بسورة يّس، أرجوكم إقروها وثبتوها في حياتكم، وخصوصا لو نفسكم في حاجة مستحيلة".

وتابع: "مفيش مستحيل على ربنا، أقسم بالله حصل قدامي شيء لا يُعقل بسبب بركة ورحمة وسند السورة دي، ركزوا في الآية دي: (إنما أمره إذا أراد شيئا أن يقول له كن فيكون)، الله يسعد قلوبكم وينصركم ويرزقكم من حيث لا تدرون".

من ناحية تانية، بيستعد تامر حسني لطرح فيلمه الجديد "ريستارت" في صيف 2025، من تأليف أيمن بهجت قمر، وإخراج سارة وفيق، وبطولة هنا الزاهد، باسم سمرة، عصام السقا، ميكا، محمد ثروت، ونخبة من النجوم.