تامر حسني عن حفله الأخير: أحلى حفلة في حياتي.. وتكلفتها تجاوزت 3 أضعاف المسرح المعتاد

شارك الفنان تامر حسني متابعيه وجمهوره، بلقطات من حفله الأخير في الأرينا، ضمن حفلات عيد الأضحى 2026.

ونشر تامر حسني صور من الحفل عبر حسابه الرسمي بموقع انستجرام، معلقًا: «حفلة الأرينا بجد أحلى حفلة في حياتي ومبسوط إنكم اتبسطوا بيها أوي كده وعملت كل اللي كنتوا بتقولولي عليه غنيت أغاني مش بغنيها وقدمت توزيعات جديدة ولعبت ريمكسات جديدة متسجلة عشان خاطركم من جديد زي ما طلبتوا مع الـ Dj هانز والموزع الكبير جلال فهمي والفنان الراقي سام محمد وسهرنا شهر كامل نسجل ونوزع من جديد كإني بعمل ألبوم ورجعت عملت عروض كاملة زي 2007 بس طبعًا بتطور مش طبيعي في المسرح المصري و العربي زي مانتوا شايفين أكيد ده مش شكل مسرح طبيعي، المسرح ده فكرتي وعملته عشان أطور بيه الصناعة مرة تانية».

وتابع: «من بعد ما أدخلت زمان الفاير وركس بشكل ضخم في كل أنحاء مصر والوطن العربي مع العبقري أحمد عصام وكمان الشاشات العملاقة المتنوعة والـ 3D mapping وطبعًا اشتراك المطرب نفسه في العروض مع الاستعراضيين بنفس كفاءتهم، قدمت ديكور مسرحي بتكلفة يمكن تجاوزت 3 أضعاف تكلفة المسرح الطبيعي المعتاد علشان أقدمهلكم ويكون نقلة نوعية جديدة بقدمها للمرة التانية في سنة 2026 على هيئة ديكور ضخم ومتنوع كل المجهود والتعب اللي عدى في الشهر اللي فات عشانكم نسيته وتحول لفرحة مع أول سقفة منكم ليا».

واستكمل تامر حسني: «فخور إني قدمت النهاردة للصناعة عملاق جديد اسمه (أمير وحيد) اللي بنا المسرح ده كله هو وشباب زي الورد مهندسين وعمال وموظفين شكرًا يا شباب شكرًا من قلبي شكرًا للأستاذ العبقري عماد نبيل والساوند سيستم الخرافي مع المهندسين الكبار عمرو خيري ومحمد مجدي وأحمد عبدالقادر».

واختتم: «شكرًا باقي أبطال الشركة من فريق السوشيال ميديا اللي كانوا بيجمعوا آراءكم طول الشهر وبيتواصلوا مع المواهب المصرية العظيمة اللي قدمتها عالمسرح في الموسيقى والتمثيل وكل الشكر لإدارة أعمالي حبايب قلبي».