تامر حسني عن طموحات ابنته: قلبي مش عايزها تدخل الفن.. المجال صعب

عبر النجم تامر حسني عن مشاعره المتضاربة تجاه رغبة ابنته "تالية" في دخول المجال الفني، مؤكدًا دعمه لها بشرط امتلاكها الموهبة الحقيقية والشغف، لكنه في الوقت نفسه عبّر عن قلقه الكبير من صعوبة الوسط الفني وتأثيره على الأطفال.

وقال تامر في تصريحات تلفزيونية: "تالية بتقولي دايمًا إنها عايزة تدخل المجال، وأنا بفهمها إن ده مش عشان أنا باباها، لازم تكون عندها موهبة بجد، وساعتها ممكن أساعدها تدور على حلمها".

وأضاف: "بس لو هنتكلم على إحساسي كأب، لا، مش عايزها تدخل الفن. المجال صعب جدًا، الناس اللي فيه أوقات بتكون قاسية، والانتقادات بتكون جارحة، ومحتاج حد قلبه قوي ويتعود على الصدمات".

وتابع بحس الأبوة: "قلب البنات حساس، ممكن كلمة تأذيها وتسيب أثر كبير في نفسها، خصوصًا وهي صغيرة، فحرام. أتمنى من قلبي إنهم يفضلوا في الرياضة، ويكملوا بطولاتهم زي ما بيعملوا دلوقتي، بس في الآخر شايفين باباهم ومامتهم، فغصب عنهم ممكن يحبوا المجال".

في سياق آخر، كشف تامر مؤخرًا عن تعرضه لوعكة صحية شديدة قبل سفره إلى دبي لإحياء حفله الأخير، حيث ظهر على المسرح برفقة نجوم فيلمه الجديد "ريستارت". وكتب عبر حسابه على إنستجرام: "مكنتش ومش عادتي أشغلكم بتفاصيل شخصية، لكن بما إن في ناس كتير عرفت، فأنا دخلت المستشفى قبل السفر بسبب تعب شديد، والأصعب إن ابني آدم كمان دخل المستشفى بعدي بأسبوع بتعب كبير. شكرًا لكل حد دعا وسأل، وربنا يشفي كل مريض ويحفظ أولادكم".