تامر حسني لمتابعيه: عقلك الباطن بيخليك تصدق صدماتك أكتر من وعود ربنا

ياسمين حمادة 12 ابريل 2023 | 01:05 مساءً

تحدث الفنان تامر حسني مع جمهوره ومتابعيه وخاصةً اليائسين، قائلًا: «لفت نظري في تعليقاتكم إن في ناس كتير مش عارفين يوصلوا وينجحوا وحاسين إن كل شيء سيء ملازمهم».

تامر حسني يوجه رسالة لمتابعيه

كتب الفنان تامر حسني في منشور عبر حسابه الرسمي بموقع فيس بوك: «فاكرين إنهم منحوسين ومصدقين إن حظهم وحش عشان مفيش أي نجاح بيحققوه ومش عارفين السبب أنا هشاور على سبب مهم وخطير من قراءتي كتير في اللي هقوله دلوقتي.. طبعًا هقول سبب غير الأسباب المعروفه زي لو علاقتك سيئة بربنا أو بوالديك وأهلك».

وتابع: «هقول سبب ممكن يكون مش في دماغ كتير مننا.. كتير من صدمات حياتك سواء ليك ذنب فيها أو ملكش ذنب فيها أو لو ناس خذلوك أو كسروك لو ناس مش كويسة نجحوا وأنت شخص كويس ومعرفتش تنجح.. ركز في اللي جاي.. عقلك الباطن ممكن يبقى هو السبب».

تصريحات تامر حسني

واستكمل تامر حسني قائلًا: «يعني أنت السبب ورا كل ده عشان عقلك الباطن بعد الصدمات وبعد كل جرح خزن معاني غلط وأقنعك بيها إنها صح زي إنك شخص قليل متسواش وملكش قيمة وخزن إن الطيبه مش كويسة ولازم تبقى شرير عشان تعرف تعيش.. خزن إن الناس اللي غلط ربنا إداهم وخدوا حقهم والمجتهد والمحترم مبياخدش حقه والأفكار الغلط اللي اتسجلت دي».

وقال تامر حسني أيضًا في رسالته للجمهور: «عمال يطلع منها كل سلوكياتك الوحشة اللي بتجذبلك كل الوحش وتلاقي نفسك محبوس مابين الغلط اللي جواك والغلط اللي بتخرجه براك وكمان إنت مأذي منه إنت واللي بتتعامل معاهم فا بتنجح في صنع طاقات سلبيه رهيبه حواليك تزيدك في هدم نفسك تخيل كل ده وأنت مش عارف إنك أنت السبب».

تامر حسني يوجه رسالة لمتابعيه

الفنان تامر حسني

وكتب أيضًا: «عقلك الباطن بيخليك تصدق نتايج صدماتك أكتر من وعود ربنا .. (( الحل)) إنك لازم تتعامل مع مخك إنه جهاز هتفتحه وترمي منه كل المعاني البايظة ومش بس ترميها ده أنت هتبدلها بالمعاني الصحيحة اللي ربنا قال عليها زي أنا هحب الخير لغيري من قلبي.. أنا مش هتكلم على حد في ظهره أنا مش هيأس».

وقال أيضًا عن الحل: «أنا هقدر أنا هوصل عشان ناس كتير غيري قدروا و وصلوا.. أنا مش هفتكر الماضي ولو افتكرته هقول كتر خيره علمني حاجات كتير حتى لو فهمتها بعد فتره.. و في حاجات بعينها لازم تصلحها بجد بجد بجد.. ثقتك في الله مهما يحصل وتبقى قد اختباراته و تسلم لقضاءه.. ثقتك في نفسك و احترامك وتقديرك لشخصك وإنك مش قليل».

وأضاف تامر حسني: «تتمسك بالمبادئ مهما تشوف ناس ماشيه غلط و بتنجح تعرف إن كل بني آدم و له اختباراته.. الشخصيه الخاصه به هو وربه فتخليك في اختباراتك إنت ركز في قصتك أنت مع ربنا يعني بلغة الامتحانات تخليك في ورقتك عشان في الآخره أنت هتتسأل في ورقتك أنت مش في ورقة غيرك».

واختتم تامر حسني رسالته: «متتعقدش فا تخلي اللي هتعرفهم بعد كده يدفعوا ثمن ذنب جراحك و شكوكك و صدماتك القديمه وتبدأ صفحة جديدة بيضاء مع نفسك في كل اتجاهات حياتك وكأنك بدلت مخك بمخ جديد نضيف نشيط متزن واعي وبإذن الله هتعرف تشوف الحياه بطريقة جديدة جميله وعايز أقول حاجه ممكن تطمن كل اللي بيحلموا و عندهم هدف نفسهم يحققوه ((مش هيكون جواك حلم بحاجة إلا و ربنا جاعل جواك القدرة على تحقيقه))».

تامر حسني