تامر حسني: متنسوش تدعولي في ليلة النصف من شعبان

طلب النجم تامر حسني من جمهوره أن يدعون له في لليلة النصف من شعبان، حيث شارك متابعيه عن فضل هذه الليلة.

تامر حسني ودعاء لليلة النصف من شعبان

كتب الفنان تامر حسني عبر حسابه بموقع التواصل الاجتماعي فيسبوك: 'صباح الخير على اغلى الناس.. معلش بعد اذنكم اقرأوا كلامي للاخر'.

وتابع: 'نص شهر شعبان، من النهارده لبكرا اعمالنا بتترفع لربنا يعني كلنا نلحق نستغفر و نطلب من ربنا يسامحنا.. محدش يتخيل إنه عمل اخطاء كتير فمالوش عين يطلب لا لا لا مهما عملت اطلب حالاً و ياريت لو نصوم بكرا انا هعمل كده اي حد عنده شغل ياريت يفضي شوية وقت عشان يستغفر و يدعي كتير بقدر الامكان'.

واستكمل تامر حسني حديثه، قائلًا: 'اليوم ده ليه سحر و انا جربته كتير قبل كده و هتحسوا في قلوبكم ان في حاجه اتشالت من عليكم و بقيتوا مبسوطين اكتر، ادعوا بكل اللي تتمنوه اوي اوي'.

وواصل كلامه: 'فرصة لاي حد عمل ذنب كبير غصب عنه او قاصد بس ندمان فرصه ان ربنا يسامحه دلوقتي بس نفتكره و نطلب منه يلا يا جماعه من دلوقتي لبكرا اعتبروا ان ده يوم بسنه كامله و جايز بكرم ربنا يبقى يوم بحياتك كلها اجتهدوا فيه اوي من صلاه من تصدق من ذكر من دعاء من صلة رحم، اليوم ده تقدر من خلاله تبدأ صفحه جديده مع نفسك و مع ربنا اوعى تحس انك بعيد و متسمعش كلام اي حد يقولك يا عم انت بتعمل و بتعمل قوله ملكش دعوه ليا ربنا هيحاسبني مش انت، و نخلي عندنا يقين مش عادي ركزوا على كلمة يقين مش عادي ان ربنا سامعنا و هيستجيب لنا و هيحققلنا اللي بنتمناه واللي هيكون صالح لينا و هيسامحنا. عشان تفرق كتير اوي لو بتدعي و عندك يقين او معندكش بتفرق كتير اوي صدقوني، و متنسوش تدعولي معاكم بعد اذنكم محتاج دعواتكم جداً'.

سبب تأجيل فيلم تامر حسني

وعلى جانب أخر، كشف الفنان تامر حسني عن سبب تأجيل طرح أغنية «يانهار أبيض» ضمن أغاني ألبوم «هرمون السعادة»، والذي أعلن عن طرحه صباح اليوم الخميس، عبر قناته الرسمية على يوتيوب.

وأوضح تامر حسني من خلال منشور عبر صفحته الرسمية على فيس بوك، قائلاً: «يا شباب يا جميل، لفت نظري سؤالكم المتكرر عن أغنية (يانهار أبيض) الحقيقة أن أغنية (يانهار ابيض) محتاجة توقيت أفضل يوسع لها علشان تنتشر صح، فتم تحويلها لأغنيات الصيف علشان خلاص شهر رمضان الكريم داخل كل سنة وانتوا طيبين.

وأضاف تامر حسني قائلاً: «الأغنيات هيبقوا ٢ أو ٣ عشان أكون معاكم إن شاء الله في الصيف بحاجة مبهجة تليق بيكم بعد رومانسيات وأحزان الشتا اللي كأبتكم بيها».

وتابع نجم الجيل قائلاً: «مبقتش شايف حد بيغنيلي إلا وبيعيط، فا ان شاء الله نرجع ببهجة جميلة في الصيف، سؤال مهم أوي محتاج رده منكم و بمنتهى الصراحة كل حد فيكم يقولي أكتر الأغاني اللي عجبته في ألبوم هرمون السعادة كله؟.. وشكرًا».

يذكر أن الفنان تامر حسني أعلن صباح يوم الخميس، عن طرح أغاني ألبوم «هرمون السعادة»، قائلاً: «دلوقتي بعد إنتهاء إصدار إلبوم (هرمون السعادة) تقدروا تسمعوه كاملاً علي جميع أعضاء الاستماع و اليوتيوب»، ولاحظ جمهوره عدم طرح أغنية «يا نهار أبيض»، وبدأ يتسائل عن موعد نزولها، مما دفع نجم الجيل للخروج عبر صفحته الرسمية على فيس بوك ويوضح أسباب تأجيلها إلى موسم صيف 2024.