تامر حسني يوجه رسالة لجمهوره بمناسبة رمضان: اقلب الصفحة وابدأ من جديد

وجه الفنان تامر حسني رسالة إلى متابعيه بمناسبة حلول شهر رمضان، داعيًا إياهم إلى ترك الماضي والتركيز على الحاضر والمستقبل.

وكتب تامر حسني عبر حسابه الرسمي: 'بروحانيات شهر رمضان الكريم زي ما متعودين إني بحاول من واقع الدنيا ومشواري الشخصي أي شيء بتعلمه لازم أوصله لكم بعيدًا عن الفن تمامًا'.

وأضاف: 'عمركم شوفتوا حد عايز يطلع خطوة قدام وباصص وراه؟ أكيد مش هيعرف.. طب هل في حد ممكن يبدأ جزء جديد في كتاب حياته، وهو قاعد لسه بيقرأ الجزء الأولاني؟ أكيد لا.. طب يعمل إيه؟ أقولك أنا… ما دام خلص الجزء الأول أو آخر صفحة فيه، يقلب الصفحة بس كده ويركز في حاضره، لأن اللي فات مش هيعرف يغير فيه حاجة، فليه بيضيع وقت مع اللي فات؟ طب الحاضر أولى'.

واستكمل: 'انسى اللي فات يا صاحبي واقلب الصفحة يلا وابدأ حالًا، محدش هينفعك، والعمر بيجري، ولو لسه في ماضيك ومخلصتش الصفحة، حاول تخلصها بأحسن طريقة على قد ما تقدر، عشان تفتح الجديدة بروح أجمل، يلا انسى كل اللي تعبك زمان، وكل ما تحبط افتكر إنك مدام صحيت ليوم جديد ولسه عايش وما موتّش، اعرف إن لسة ربنا عايز منك حاجات، يعني ليك لازمة كبيرة جدًا، يلا قوم دور عليها واقلب الصفحة'.

واختتم رسالته قائلًا: 'ابدأ بصفحة جديدة جميلة زيك، والله والله ده كلام حقيقي من واقع الحياة ومن واقع تجربة أي حد حلم وقدر يحقق أحلامه، مادام صحيت، أنت ليك لازمة، قوم يلا اقلب الصفحة'.