تامر عبد المنعم : بشوف نفسي إعلامي ناجح وخلافاتي مع محمد فؤاد مستمرة

ياسمين حمادة 26 مارس 2023 | 03:30 صباحاً

كشف الفنان والإعلامي تامر عبد المنعم تفاصيل ما حدث في جنازة الإعلامي الراحل مفيد، كما رد على شائعات صعوبة فتح قبر مفيد فوزي، قائلًا: «قبر إيه اللي مكنش عايز يتفتح؟ في حُرمة للميت ودي فتنة».

تامر عبد المنعم ومفيد فوزي

وتابع الفنان تامر عبد المنعم حديثه عن مفيد فوزي في تصريحات تلفزيونية له: «هو أحد رموز إخوانا المسحيين الأقباط وهو رمز كبير ورجل جميل وكان صديقي وأنا أفتخر أن الكاتب الراحل مفيد فوزي كان صديق ليا، ولما عرفت أنه عيان كلمت ابنته حنان مفيد فوزي، وهي عارفة أنه كان حبيبي وكان لازم نتقابل بشكل أسبوعي يا إما في بيتي أو بيته».

وأضاف: «هو أكبر من والدي ولكن هو كان راجل من ذكائه إنه يعرف يصادقني وكان مصاحب كارما بنتي وكتب عنها مقالة، وابنته قالتلي روحله لأنه مُكتئب جدًا وعارفة أنك أنت اللي هتفكه».

واستكمل حديثه عن آخر لقاء جمعهما وقال: «رُحت له قعدت معاه وإداني كتاب وكتبلي إهداء عليه، وأنا ماشي شعرت أن الراجل ده في حاجة هتحصل وكنت عامل زي عزرائيل وكنت عارف أن دا لقاء الوداع، وهو كان شخص مُحب جدًا للحياة وللوطن وكان صريح، وكان له مذاق ونكهة فهو كان علامة».

تامر عبد المنعم

تصريحات تامر عبد المنعم

وقال الفنان والإعلامي تامر عبد المنعم عن فترة عمله كمذيع، إنه يتمنى العودة من جديد للإعلام، مضيفًا: «بشوف نفسي مذيع ناجح لأني كنت مؤثر وكنت بقول كلام غيري مقالوهوش، كنت بقول الحق سنة 2011، قُلت خونة ومحدش صدق وطلعوا خونة، وغيري عام مع الموجة وأنا وقفت ضد الموجة».

وأضاف: «و98% من اللي كانوا بيطلعوا في التلفزيون عاموا مع الموجة وفي منهم كان شريك في الموجة، ودلوقتي غيروا كلامهم ولسة هيغيروا الكلام والأيام بيننا، وهناك بعض الإعلاميين والإعلاميات بيطلعوا جهلة ومبيعرفوش يقولوا كلمتين على بعض».

عن عودته مرة أخرى، قال: «نفسي أرجع لكرسي المذيع تاني، ولكن هرجع أقول الحق اللي ينفع بلدي، وأكيد هكون في صف الناس والمذيع لازم يكون في صف الناس، والمذيع لازم يكون له وجهة نظر، آه الإعلام لازم يكون حيادي لكن دا في الخبر، لكن المذيع اللي له برنامج لازم يكون له وجهة نظر ويدافع عنها».

تامر عبد المنعم ومحمد فؤاد

وأشار إلى أن خلافاته مع الفنان محمد فؤاد مستمرة فالأمر خرج من بين أيديهم ولا يمكن حله بشكل ودي، كما أنه من المستحيل أن يتعاون مع فؤاد مرة أخرى في أي عمل فني.

وقال تامر عبد المنعم أيضًا: «خلافاتي مع محمد فؤاد منتهتش ولسة في قضايا لسة لم تنتهي، والحكم 28 سبتمبر وأعتقد في استئناف، ودي قضية مدني مفيش فيها حبس، ولكن فيها حق وأنا صاحب حق من وجهة نظري وهو صاحب حق من وجهة نظره، إحنا اتقابلنا واتعشينا مع بعض ومتكلمناش في القضية خالص، وخلي القضية للمحاميين، والموضوع خرج من إيدي ومن إيده علشان يتحل ودي، والقضية حُجزت للحكم، ولا يمكن أشتغل مع محمد فؤاد تاني».

تامر عبد المنعم وعمليات التجميل

وعلق تامر عبد المنعم على عمليات التجميل للفنانات، قائلًا: «كل اللي عملوا عمليات تجميل بقوهم واحد وبعض الأجزاء في جسمهم واحدة، هو الدكتور والنحات واحد، ومش عارف إيه فكرة أن الواحد يغير من خلقته أو يفكر نفسه هيحارب الزمن أو أنه هيبقى حلو لما يعمل كده، مفيش أحلى من الطبيعي وجمال الروح، وجمال الروح ده بيطفح على الوش وبيخلي البني آدم يحبك أو ميحبكيش».

تامر عبد المنعم