تصريحات هنا الزاهد: بقيت أهلاوية بسبب أحمد فهمي.. وشهر العسل كان الفترة الأسوأ بحياتي

تصريحات هنا الزاهد تصدرت مؤشرات البحث خلال الساعات الماضية، وذلك عقب حديثها عن علاقتها بزوجها الفنان أحمد فهمي وكشفها لكواليس مسلسلها الأخيرة سيب وأنا سيب.

تصريحات هنا الزاهد

موقع قناة صدى البلد، يرصد فيما يلي تصريحات هنا الزاهد في أحد اللقاءات التلفزيونية، وإليكم التفاصيل.

هنا الزاهد وشائعة انفصالها

قالت هنا الزاهد في تصريحات تلفزيونية: «علشان انت اخترت تبقى ممثل أي إشاعة تتطلع عليك لازم تستقبلها من غير ما تؤثر على نفسيتك، وأكيد أنا إنسانة وأتأثر بالشائعات، لكن مش برد».

وتابعت هنا الزاهد حديثها، وقالت: «أحب حياتي الشخصية تبقى بعيد عن شغلي، والناس تتكلم عن أعمالي».

هنا الزاهد وأحمد فهمي

كما كشفت هنا الزاهد كواليس الأعمال التي تتعاون فيها مع زوجها أحمد فهمي، وقالت: «بخاف منه جدًا في التصوير، لإنه في الشغل متوتر جدًا ومش بيحب الغلطات، لكن بيراعي إنه ميزعلنيش أو يزعل الناس اللي حواليه، واشتغلنا مع بعض في الواد سيد الشحات ومستر إكس، والحمد لله كان وشي حلو عليه في العملين».

هنا الزاهد تكشف حيلة مسلسل سيب وأنا سيب

قالت هنا الزاهد في تصريحات تلفزيونية: «أحمد السعدني حجمه ضخم جدًا، وكنت طول المسلسل باصة لفوق ودماغي إتلوحت، وفي المشاهد القريبة كان لازم أقف على خشب علشان أقدر أقرب شوية من طوله».

أما عن الشتائم والسباب في مسلسل سيب وأنا سيب، قالت هنا الزاهد: «أول ما بدأنا المسلسل المخرج وائل إحسان قالنا عايزكم تبقوا طبيعيين جدًا وزي الناس ما بتتعامل في الشارع، ودول شخصين متربيين مع بعض، لكن احنا مش قصدنا نقول شتائم».

هنا الزاهد وأحمد السعدني

وأضافت: «المشهد اللي حصل عليه مشاكل أظن يسأل عنه المخرج، لإنه كان المفروض ياخد كادر واسع لا يظهر حركة الشفاه، وأنا مكنتش في المشهد واستغربت وسألت أحمد السعدني انت قولت كده بجد».

شهر عسل هنا الزاهد

وعلقت هنا الزاهد عن شهر العسل الذي قضته مع زوجها أحمد فهمي مشيرة إلى أنها أسوأ فترة عاشتها بحياتها بسبب تعرضها لوعكة صحية.

وقالت: 'شهر العسل كان أوحش حاجة حصلتلي في حياتي، كنت تعبانة ووصل وزني 47 كيلو ومرارتي اتفقعت كان في حصوات في المرارة وتبعت جدا'.

وأضافت: ' أول يومن كانوا تمام تالت يوم بدأت أتعب وشي يحمر وأسخن افتكرت إن جالي تسمم، طلع إن مرارتي فيها حصوات كتيرة وكان المفروض تتشال وجالي التهاب في بطني كله قالوا اقطعوا إجازتكوا وأرجعوا بلدكوا، كنا في سنغافورة لحد ما تبقى كويسة وقعدت شهر أكل مسلوق وبعدها أعمل عملية'.

هنا الزاهد وزوجها أحمد فهمي

انتماء هنا الزاهد الكروي

وعن انتماءها الكروي، قالت هنا الزاهد: 'أنا كنت زملكاوية وأحمد فهمي خلاني أهلاوية بالعافية، قالي مينفعش تبقى زملكاوية مينفعش قدام الناس تقولي إنك زملكاوية وتكسفيني عشان الناس عارفة إني أهلاوي جدا، وقولت همشي أموري خلاص كده كده مليش في الكورة أوي'.