تعليق ناري من أحمد موسي على سخرية السوشيال ميديا من إعلان مدينتي .. فيديو

عبر الإعلامي أحمد موسى، عن استيائه من التنمر الذي تعرض له إعلان مدينتي، الذي يعرض عبر شاشات التليفزيون، خلال شهر رمضان الكريم.

وقال أحمد موسى، في برنامج «على مسئوليتي»، المذاع عبر فضائية «صدى البلد»: "هشام طلعت مصطفى عامل إعلان لمدينتي إيه المشكلة وإيه اللي يزعل، ليه التنمر حتى في الإعلان، هشام طلعت مصطفى واحد من أكبر البنائين في مصر والوطن العرب، وتصميم رائع لمدينتي وتخطيط عمراني ناجح، عملها في قلب الصحراء، شوفوا مدينتي من 15 أو 20 سنة كان شكلها إيه ودلوقتي شكلها إيه".

وأضاف: "لما هشام طلعت مصطفى خد مدينتي أخدها علشان يعمل تنمية حقيقية وعمل فعلًا، ولكن الناس بتتريق على أي حاجة وعايزين يطفشوهم من البلد، بيهاجموا وخلاص، ياجماعة فيه ناس فاتحة عشرات الآلاف من البيوت زي الحاج محمد أبو العنين وهشام طلعت، ومئات الملايين بتدفع للناس، الناس دي بتعمل خير مش عايز أقولكم حجمه كبير إزاي".

وتابع: "ليه بتتريقوا وبتتنمروا على سكان مدينتي دي ناس تعبت وشقيت علشان تسكن فيها، الناس دي بتموت علشان تقدر تعيش، اشتغلوا واشقوا علشان ربنا يكرمكم وتسكنوا في أفضل أماكن، ليه بتتريقوا وتبصوا عليهم، اشتغلوا واعملوا زيهم، ليه بتضايقوهم وتبصوا لهم الرزق بتاع ربنا".

وواصل: "أنا سعيد إني من قرية اسمها شطورة وبكون أكثر سعادة لما بروح القرية وأبقى في وسط أهلي ما اتولدناش في بقنا معلقة ذهب احنا شقينا وتعبنا".

واختتم: "ابذل مجهود الناس دي تعبت واشتغلت على نفسها، كل دول تعبوا واشتغلوا بدل الشغلانة عشرة، أنت عايز تبقى نايم في البيت ويجيلك الدولارات، اشتغل وماتبصش لغيرك، راعي ضميرك في شغلك وراعي ربنا علشان يكرمك ويرزقك، شوفوا هشام طلعت عمل إيه في مصر، ده من أكبر البنائين في البلد، شجعوا الناس خليهم يبقى عندهم نفس يشتغلوا، وبلاش نهد الناجحين دي بلدنا كلنا".