تفاصيل الأيام الأخيرة فى حياة إياد داوود ورحلة صراعه مع المرض

ناجى أبو مغنم 08 مارس 2022 | 12:38 صباحاً

كشفت سلمى صباحي تفاصيل الأيام الأخيرة فى حياة إياد داوود الذي رحل عن دنيا قبل أيام، ورحلة صراعه مع المرض.

وقالت عبر حسابها الرسمي على موقع التواصل الرسمي الاجتماعي «فيسبوك»، أنا عرفت إياد منذ ١٧ عاما واليوم رأيتُ ذكرياتنا كأنها شريط سينما يمر أمامي.

بداية إياد داوود في برنامج شبابيك

وأضافت سلمى صباحي، «عرفنا بعض ٢٠٠٥ واحنا بناخد ورشة اختيار المذيعين في قناة دريم و منها اختارونا عشان نقدم شبابيك .. هو أول حد بقى صاحبي من المجموعة بحُكم أن تفكيره كان شبهي و تربيته و ذوقه و حتى سكنه كان في العماره اللي قصادي، و كنت دايما باروح مدينة الإنتاج معاه وأرجع معاه، وبدأت رحلة الصداقة بيننا و كانت بتكبر بالعشرة والشغل مع بعض في شبابيك وبعد كده ولاد البلد ..اتشهرنا سوا و كبرنا سوا و فضلنا صحاب و علاقتنا اتوطدت أكتر و بقى صاحب كل صحابي و معانا دايما.. يمكن نُص الناس اللي شفتهم النهارده و امبارح عرفوه عن طريقي و بقى بالنسبة لهم إياد الدود dude زي ما كان دايما يندههم.. يا دوووود».

وأضافت: «أياد و كان بالنسبه لي انا البرو زي ما كان بيقول هو ال bro و انا ال sis .. الأخ والأخت، إياد كان موهوب جدا و شاطر جدا ..كان مذيع شاطر و مجتهد وبروفيشنال .. كان rapper جامد و عنده فكر و دماغ حلوة في الكتابة والأداء في وقت الراب ماكنش منتشر في مصر».

وأوضحت سلمى صباحي «كان إياد داوود ممثل هايل و كان نفسه ياخد فرصة حقيقية و الناس تشوف أد إيه هو ممثل متميز .. كان من أفضل مدربي التمثيل في مصر بشهادة كل الطلبة بتوعه، وانا حضرت معاه مره و انبهرت بيه.. كان حلمه ياخد الأوسكار،، وكان يستاهل الحلم ده .. كان حلمه يفتح مدرسة تمثيل و تبقى في يوم من الأيام اكاديميه كبيره بإسمه .. كان عنده شغف حقيقي و كان صادق .. كان إنسان.. قلبه ابيض زي الأطفال .. كان نفسه يتجوز و يبقى أب .. إياد كان بيحب الأطفال اوي و علاقته بحلم بنتي كانت رائعة».

وفاة إياد داود مقدم برنامج ولاد البلد

إياد داود

موعد عزاء الفنان إياد داوود

وفاة الفنان إياد داود

وواصلت سلمى صباحي شرح تفاصيل الأيام الأخيرة في حياة أياد «طول عمره قلبه اللي سايقُه كان علطول بيحب حتى لو في خياله.. كان كريم جدا جدا و بيحب يبسط الناس اللي بيحبهم بهدايا او ورد او عزومه والأهم من كل ده باهتمام حقيقي من قلبه .. كان بيحب منير جدا و عمري ما هانسى ريأكشنه يوم ما خليت منير يكلمه في التليفون لأول مرة، و بعد كده بقوا صحاب و هو اللي جابه فرحي».

واستطردت «إياد داوود فقد أمه و اخته و أبوه، وكل حد فيهم ساب جواه أثر كبير و اتخبّط ف حياته كتير و الدنيا ماكانتش رحيمة بيه، بالرغم من كل الحب اللي محاوطه، من أول ما عرفت إياد و هو دايما معاه بخاخ للتنفس و للأسف تعب جدا آخر ٧ شهور ف حياته و عمل عملية كبيره في الرئه و كان عايش بخرطوم متوصل بالرئه و كان بيتكلم بالعافيه لأنه مش قادر ياخد نفسه كويس .. ربنا يجعل تعبه في ميزان حسناته..

واختتمت: «آخر مرة كلمته كان قبل ما يمشي بيوم واحد و كان صوته تعبان بس كان سعيد انه بقى عم و خالد اخوه جاب بنوته، و سماها منال على اسم اختهم الله يرحمها ،، كنت المفروض ازوره يومها بس للأسف مالحقتش، إياد ارتاح ، و أحلامه مكمله معاه و هايحققها في الجنه و نعيمها وسط أهله و حُبنا كلنا».