تفاصيل جديدة في وفاة علاء علي.. «مات بأزمة قلبية وليس السرطان»

كتب: أنس سمير

كشف الصحفي أحمد شاكر، معد برنامج «الماتش» على قناة صدى البلد، تفاصيل جديدة حول أسباب وفاة علاء علي، لاعب الزمالك السابق.

وقال شاكر عبر صفحته على «فيس بوك» «الكل كاتب إن علاء علي توفى بعد صراع طويل مع السرطان، لكن علاء مكنش عنده سرطان، ومكنش صراع وفترة طويلة ولا حاجة».

وتابع «علاء علي اكتشف ان عنده ورم حميد في المخ شهر يوليو اللي فات يعني من 4 أشهر وتم استئصاله وابتدى ياخد علاج»، مشيرا إلى أن عملية الاستئصال أثرت بشكل كبير على القلب _ على حد تعبيره_.

وأضاف « كان تعافى تماما من آثار الورم في أيامه الأخيرة، ووقف علاج، وبدأ كمان ينزل الجيم، لكن كان بيعاني من صعوبة في التنفس ووجع في القلب بسبب العلاج اللي كان بياخده بعد استئصال الورم ، والوفاه كانت بسبب أزمة قلبية، وقبل ميعاد كشفه عند دكتور القلب بساعتين بس».

قلبي واجعني ومش عايز أتكلم

وكان الإعلامي هاني حتحوت قد كشف معلومات حول تفاصيل وفاة علاء علي.

وقال حتحوت خلال برنامج «الماتش» على قناة صدى البلد «علي تواصل مع نانسي القاضي، مراسة صدى البلد، قبل وفاته بثلاثة أيام وقا لها أنا الحمد لله خفيت لكن قلبي واجعني، وبحاول أتمرن عشان أرجع».

وتابع «الراحل أرسل لنانسي القاضي قبل وفاته بيوم وقالها أنا تعبان جدا وقلبي واجعني ومش عايز أكلم مع حد».

مش عايز أتكلم واستعطف حد

نشرت نانسى القاضي، مراسلة قناة صدى البلد، على حسابها بموقع فيس بوك صورة من محادثتها مع علاء على عبر واتس آب قال لها فيها «أنا مش عارف هو قرار صح ولا غلط أنى أطلع اتكلم ، بس أي حد بيعرف الموضوع بيقولى لازم تطلع تتكلم وتقول انك مش بتلعب ليه وكنت فى ليه، أنا معرفش استعطف حد ومش هقول أنى عندى أقساط وهعيش منين، أنا أخرى لو طلعت هتكلم عن فترة علاجى وانى مختفى ليه، وانى معرفش هرجع العب كرة تأنى ولا لا».

وعلقت نانسى القاضى على صورة محادثة علاء قائلة: «علاء كان ناوي يطلع يعرف الجمهور هو كان مختفي ليه، بس كان خايف إن حد يفتكر إنه بيقول كدا علشان محتاج حاجة، عاش عزيز النفس ورافع راسه ومحدش اداله مليم في علاجه، هو كان نفسه بس يشوف حب الناس دا له في حياته، ادعوله بعد ما راح لانكم مكنتوش تعرفوا علشان تدعوله وهو عايش، صباحك أحلي في الجنة».