حساسية شهر العسل.. مجدي بدران يحذر من "قنابل موقوتة" تهدد الجهاز التنفسي في الشقق الجديدة

أكد الدكتور مجدي بدران، عضو الجمعية المصرية للحساسية والمناعة، أن بعض الأشخاص قد يتعرضون للإصابة بالحساسية بمجرد الانتقال إلى شقة جديدة أو استئجار وحدة سكنية سبق أن سكنها آخرون، موضحًا أن هناك العديد من العوامل البيئية داخل هذه الشقق قد تكون سببًا مباشرًا في ظهور أعراض الحساسية ومشكلات الجهاز التنفسي.

وقال خلال لقائه مع الإعلامية نهال طايل في برنامج 'تفاصيل' المذاع على قناة 'صدى البلد2': ' ممكن تجيلنا الحساسية من الشقة الجديدة، بسبب الغبار مثلا واحد كان قاعد عند والدته مكنش في مشاكل، خد شقة،وبيحضروا الشقة الجديدة ، الشقة الجديدة عشان يحضروها ويبنوها طوبة طوبة، اتعرضوا للأسمنت، الجبس، الديكور، الغراء، فكل ده ممكن يخليهم يجيلهم حساسية، الغبار اللي موجود محدش كنس محدش مسح، فترة طويلة لحد ما الريحة بتاعت الخشب والدواليب والحاجات دي تروح من الشقة ومفيش تهوية وفرحانين بالتكييف فممكن في حساسية للشقق الجديدة نسميها حساسية شهر العسل'.

وأضاف: 'الشقق اللي بتعدي عليها الإيجارات بيبقى فيها إهمال شوية في النظافة، بيبقى فيها قنابل موقوتة للحساسية أنا مش شايفها،  الصرصار بيكتر في الصيف، الصرصار قنبلة موقوتة للحساسية لأنه ممكن يسيب مخلفات ويمشي بعيد عني  5 سنوات تعملي مشاكل في البيت'.

وأوضح: 'الفضلات بتاعت الصرصار بتبقى عاملة زي الفلفل الأسود ودي بيبقى فيها مادة لاصقة بتلزق، في الأدراج، في الدواليب الخشب، في الشقوق الصغيرة، تنشف بعد كدة وتتلزق، نظفتيها كنستيها شمتيها وظهرت الحساسية، يبقى فضلات الصراصير فيها مسببات كثيرة جداً للحساسية ممكن تعمل التهابات وممكن تعمل المشاكل زي عطس حكة انسداد في الأنف سرسيبة من ورا حكة في العين'.

وأشار إلى أن هذه المسببات قد تؤدي إلى صعوبة في التنفس دون أن يدرك الشخص السبب الحقيقي، خاصة لدى الأطفال الذين يقضون وقتًا طويلًا داخل المنزل.

واختتم : 'لما نستلم الشقة الإيجار دي قبل ما ننظفها مفروض ننظف الحاجات دي كلها بالتنظيف الرطب أو التنظيف اللي فيه سوائل مية مش التنظيف الجاف الكنس، الكنس هيخلينا أعبي وأخد الغبار ده كله، يبقى دي نقطة مهمة جداً في الشقق الجديدة'.