حسام حبيب يحسم جدل خطوبته: على طول الناس بتخربلي حياتي

حسم الفنان حسام حبيب جدل خطوبته من عارضة الأزياء الأردنية سارة، بعد ظهوره معها في أكثر من صورة تجمعهما في مناسبات مختلفة.

قال حسام حبيب عبر تصريحات تلفزيونية: «الموضوع موصلش خالص للخطوبة نهائي، هما سبقوا الأحداث وخلوا الموضوع يتعقّد بدل ما يحصل فيه خير. يعني اللي حصل ده، مش عارف أقولهم إيه بصراحة».

حسام حبيب يحسم جدل خطوبته

وتابع: «وأصلاً الحاجة اللي بيتكلموا عنها عمرها ما وصلت لربع اللي بيتقال، ومش عارف الناس عايزين إيه مني بجد، على طول الناس بتخربلي حياتي!، وإن كان في حاجة، هما كده بوّظوها، لأن أهل البنت لهم عاداتهم وتقاليدهم، وناس محترمين جدًا جدًا».

واستكمل حسام حبيب: «زي ما إحنا زمان كان لنا عاداتنا وتقاليدنا، وكنا بنتحرم يعني إيه بنت، يعني إيه نِفسِن عليها… مش عارف إيه اللي حصل للمصريين؟ النخوة اللي كانت عندنا راحت فين؟، يعني مش عارف الناس بقت بتتكلم في أي حاجة لمجرد التريند وتحقيق المشاهدات بس! وييجوا يقولوا: حسام هو اللي بيدوّر على اللقطة! فين اللقطة اللي بدوّر عليها؟ إنتو اللي بتدوروا ورايا أهو».

تصريحات حسام حبيب

وأضاف: «ابعدوا عن حياتي بقى، أنا مش عارف إيه ده! إمتى هتسيبوا الناس في حالها؟ عمرنا ما اتكلمنا عن مين خَطَب ومين اتجوز، ولو حصل، بيتكلموا بعد الأحداث، دلوقتي بيتكلموا عن بنت ولها عائلة كبيرة، وبقى كل همنا التريند والفيديو ده يجيب كام؟، أنا مش عايز حد يتكلم عني، ولا الناس كلها تتكلم عني، طلعت مع بسمة وهبة وقلت إن الجمهور بقى آخر همي، عشان أوصل رسالة إني مش عايز تريند، هو فيه فنان بيقول كده؟ هما وصلوني لكده!».

واختتم حسام حبيب: «وكل شوية يطلعوا يقولوا إن حسام حبيب صرّح، أنا صرّحت فين؟ أنا ماقلتش حاجة لحد نهائي! وبعدين بيقولوا إن علاقتي بالبنت دي من سنين! هي أصلاً البنت عندها كام سنة عشان يتقال كده؟، واللي جاي بقى هيبقى وحش، وهيبقى فيه قضايا، ولازم كل حاجة يكون لها حدود، ومش المفروض نتكلم عن أعراض الناس، وأنا هشوف مين اللي كتب الكلام ده على لساني وهحبسه، لأني ماقلتش لأي حد، وأنا هكبر المشكلة، لأن البنت دي بنت ناس كبيرة أوي في الأردن، فهندخل القضايا ونشوف بقى!».