حسام داغر في رسالة مؤثرة لـ سليمان عيد: رجلي مكانتش شايلاني وأنا شايلك معاهم

ودع الفنان حسام داغر صديقه الفنان سليمان عيد برسالة مؤثرة، عبر حسابه الرسمي بموقع فيس بوك.

وكتب حسام داغر في منشور عبر حسابه الرسمي بموقع فيس بوك: «أخيرًا قدرت أمسك الموبايل واكتبلك يا سليمان.. من إمبارح بعد صلاة الجنازة وبعد ما شوفتك نايم في الخشبة حسيت الدنيا بجد ملهاش لازمة وكله هيمشي.. خلاص كدة.. مفيش ضحكتك مفيش هزارك.. مفيش طيبتك.. مفيش خوفك وحبك على الناس ومراعاة مشاعرهم حتى لو على حسابك».

رسالة حسام داغر لـ سليمان عيد

وتابع: «كنت فاكر نفسي طيب لحد ما قابلتك لقيتك مصدر الطيبة نفسها.. شوفت حب الناس ليك إزاي.. الناس كانت شايفاك شبهها وقريب منها.. كل عيلة فيها خال أو عم شبهك.. بس مفيهاش أب زيك.. شوفتك مع ولادك وعيلتك وحتى قرايبك عامل إزاي.. جوزت الواد والبت وأطمنت عليهم».

واستكمل حسام داغر حديثه عن سليمان عيد: «كنت خلاص هتبدأ ترتاح من تعب السنين وشقا العمر وتاخد الجماعة وتبدأ تفكر في نفسك.. الحمدلله أنك مشيت ومفيش في نفسك حاجة.. اه لو الناس تعرف كنت راضي قد إيه ومبتكسفش حد قد إيه حتى لو على حساب نفسك.. سيبت كل الدنيا وروحت للي أحسن منها في الجنة».

تصريحات حسام داغر

واختتم: «هتشوف أمك وأبوك اللي وحشوك كتير وإن شاء الله تنعم بصحبة النبي سيدنا محمد في الجنة زي ما كنت بتطلبها في كل صلاة.. كنت جاي الدنيا لهدف كبير وهو إضحاك الناس وتشيل عنهم همومهم.. الحمدلله أنك أديت الأمانه وارتحت.. الموت صعب على اللي حبوك وعاشروك بسبب ألم الفراق.. بس أنا مطمن عليك أنك أكيد في أحسن مكان.. رجلي مكانتش شايلاني يا حبيبي يا سليمان وأنا شايلك معاهم وهدعيلك من قلبي زي ما كنت بتدعي لأمي يوم ما جيتلي الخاتمة عليها من كام سنة.. الله يرحمك يا أطيب قلب.. الله يرحمك يا سليمان».