حلمي عبدالباقي يكشف مصير ويجز والإيرادات التي حققتها النقابة في 4 شهور

إسماعيل هاني 04 مارس 2023 | 12:57 صباحاً

كشف المطرب الكبير حلمي عبدالباقي، عن الايرادات التي حققتها نقابة المهن الموسيقية، وأزمة مغني المهرجانات، بالإضافة إلى أزمة ويجز مع النقابة.

وقال حلمي عبدالباقي، ببرنامج سبوت لايت المذاع على قناة صدى البلد تقديم شيرين سليمان: «عدينا في النقابة ايرادات تخطت 30 مليون جنيه في 4 شهور، وجبنا كل مغنيين المهرجانات وعملنا اجتماع معاهم والمشكلة دي اتحلت« .

وتابع حلمي، أن مصطفى كامل جلس معهم وأبلغهم أنه ضد منع أي مطرب من الغناء، متابعا: قالهم بصوا انتوا واجهة مصر لما نسافر بره، ومش هينفع نقول أي لفظ خارج، ولازم كل واحد فينا يمضي على كدة ويبصم، وأي اغنية هتنزل لازم نبعتها على المصنفات الفنية الأول قبل نزولها، ووافقوا على كل الشروط دي.

واستكمل حلمي ببرنامج سبوت لايت: ما حدث كان احتواء صح، وكان أيام الأستاذ هاني شاكر (ناس مع وناس ضد) وكان فيه لغط كتير في الشارع، ومغني المهرجانات ليهم شريحة كبيرة جدا في الشارع وليهم مزيكا حلوة ولكن كل التعليق عليهم في الكلمة واحنا ضد الكلمة المسفة لأنها بتدخل بيتي والأطفال بيرددوها وكان لازم نحافظ على الذوق العام ومغني المهرجانات ينتمون لشعبة الأداء الصوتي.

وأوضح، أن أي مطرب مهرجانات هيسافر بره يجب أن يحصل على تصريح من النقابة، لأنه ملتزم على المحافظة على الذوق العام.

وعن أزمة ويجز مع النقابة قال: ويجز المفروض يجي النقابة زي ما كل الناس جت النقابة، ويمضي على كل الاقرارات زي بقيت مغني المهرجانات، ولغاية دلوقتي مجاش وملوش تصريح بالغناء لحد دلوقتي، ويعمل حفلات برة مصر، ولكن جوة مصر لازم يجي يمضي على الاقرارات بأنه ممنوع أي كلام فيه ابتذال بأغانيه وحفلاته، وعليه أن يأت للنقابة والامضاء على الاقرارات إذا أراد إقامة الحفلات في مصر.

حلمي عبدالباقي: أنا اكتشفت نفسي وجيلنا محظوظ

تحدث المطرب الكبير حلمي عبدالباقي، عن ذكرياته مع الغناء وبداية مشواره الفني وموقف تعرض له في حياته.

وقال حلمي عبدالباقي، ببرنامج سبوت لايت المذاع على قناة صدى البلد وتقديم شيرين سليمان: جيلنا كان محظوظ، ولكن مش محظوظ إعلاميا والمتلقي كان مختلف عن دلوقتي ولما كنا بنعمل أغنية كنا نتوقع انها رايحة في حتة تانية لان المتلقي سميع للأغاني

وتابع حلمي: أنا اللي اكتشفت نفسي ومحدش اكتشفني وأنا من الزقازيق، وكان فيه افراح عندنا وصاحب الفرح كان صحابي بيخلوني أغني

واستكمل عبدالباقي ببرنامج سبوت لايت: لما جه العيد القومي لمحافظة الشرقية خلوني أغني في الحفلة دي، ومن ساعتنا اكتشفت اني بغني كويس.

وأضاف حلمي: على مدار حياتي في مواقف كتير لما بفتكرها بضحك، وكنت في كورال الجامعة بغني صولو ومكنتش أعرف يعني إيه موال ومقام، واتعلمت كل ده بالممارسة، ومرة كنت طالع في حفلة تبع الجامعة وكنت بغني للاستاذ محمد العزبي،

وكنت مبسوط جدا وقتها ولما خلصت قولت للاستاذ قطب ايه رأيك؟ فقالي إيه القرف ده عمال تدخل من مقام وتدخل مقام تاني، وكانت نقلة في حياتي وكنت لازم اتعلم واثقف نفسي وبقيت أعرف من الموسيقييين

كل حاجة محتاج أعرفها في المزيكا.