حمو بيكا: كلنا جهلة ومحدش كامل.. واتعلمت حاجات المتعلم جاهل بها

كريم فؤاد 20 اغسطس 2021 | 10:54 صباحاً

وجه مطرب المهرجانات الشعبية حمو بيكا رسالة إلى منتقديه على أنه لا يستطيع القراءة والكتابة.

وأضاف عبر صفحته الرسمية بموقع التواصل الاجتماعي «فيس بوك»: « طب وايه يعني عندي اخواتي وقرايبي بيقرولي وبيكتبولي اللي انا عايزه ؟ ببساطه محدش فينا اتولد عارف كل حاجة ! كلنا كنا مغيبين عن كل حاجة».

وتابع بيكا: «كلنا جهلة الدكتور جاهل عن المحاماه والمحامي جاهل عن المحاسبة والمحاسب جاهل عن المهندس 'الكمال لله وحده '- محدش كامل».

واستطرد حمو بيكا : «وزي ما قولت انا منولتش شرف التعليم بس اتعلمت ازاي اشتغل واشيل مسؤليه اتعلمت ازاي اشقي من صغري ومقولش لحد اديني زي ما انا اتعلمت حاجات كتير جداً في الحياة - انت يا متعلم هتفضل جاهل بيها فإن حد يكتبلي او يقرالي .. دي حاجة متخصش حد في الدنيا».

وكان مطرب المهرجانات الشعبية حمو بيكا وجه بالأمس رسالة إلى كل المتنمرين عليه، بسبب عدم حصوله على شهادة، بعدما هنأ طلاب الثانوية العامة بنجاحهما .

وكتب بيكا عبر حسابه الشخصي بموقع التواصل الاجتماعي «فيس بوك»، قائلا: «بتقولو عني جاهل ومش متعلم.. مع إن دي حاجة أنا عمري ما أنكرتها ولا حتي خبيتها على الناس من يوم ما ربنا كرمني واتشهرت وبقي ليا جمهور، بس هرجع وأقولكم تاني إنها حاجة مكنتش بإيدي».

وأضاف: «أنت بقي يا متعلم التعليم علمك إنك تقعد تعاير الناس بعيوبها؟، التعليم علمك إنك تفضل تتنمر على خلق الله؟، التعليم علمك إنك مباح ليك الشتيمة في حد هو أقل منك في شيء؟، أكيد لا، فمتجيش من ورا شاشة وكيبورد تعمل فيها عم الناصح».

وتابع: «وأنت أصلا موركش حاجة تعملها!، أنا متعلمتش ومنولتش الشرف الكبير ده، بس اتعلمت حاجات كتير في الدنيا أنت متعلمتهاش لسه، اتعلمت احترم الكبير والصغير.. اتعلمت أشقى وأتعب من صغري، اتعلمت إني مغلطش في حد.. اتعلمت حاجات كتير جدا في حياتي أنت عمرك مهتتعلمها طول ما أنت باصص للناس!، فكر في كلامك كويس وكومنتاتك كويس قبل ما تكتبها، وقبل ما تقول إنك متعلم افتكر إنك في تربية وتعليم، يعني التربية قبل التعليم».