حمو بيكا: مفيش شغلانة مشتغلتهاش.. وهيجي يوم وهبطل الغناء وابقى رجل أعمال

تحدث مؤدي المهرجانات حمو بيكا عن فكرة اعتزاله الغناء ونصح الرجال عن كيفية التعامل مع زوجاتهم، وقال رأيه في أغاني محمد رمضان.

نشأة حمو بيكا

تحدث حمو بيكا عن نشأته، وقال في تصريحات تلفزيونية: «كنت حاطط أمل أن ربنا هيكرمني بشكل عام، طول عمري كنت راجل شقيان وكان عندي أمل أني هكون حاجة في يوم من الأيام، واشتغلت جزار ونجار ومفيش شغلانة مشتغلتهاش، ومكنش هدفي الأغاني اطلاقا، والدي اللي شجعني أغني وقالي أعمل أغنية زي زمايلك، وكانت من كلماتي وألحاني اسمها قشطة».

حمو بيكا يتحدث عن امكانية اعتزاله الغناء

كشف مؤدي المهرجانات حمو بيكا، إمكانية اعتزاله الغناء، متحدثًا عن المهنة التي سيعمل فيها عقب الابتعاد عن الفن، بجانب حديثه عن ابنته تاج.

وقال حمو بيكا في تصريحات تلفزيونية، أنه سيعتزل الغناء في يومًا من الأيام، متابعًا: «هيجي عليا وقت وأبطل غناء، ولما أبطل هدير الأستوديوهات بتاعتي، وهبقى بيزنس مان».

حمو بيكا وابنته

وأعرب حمو بيكا عن سعادته الكبيرة بقدوم أول مولود له تاج، مؤكدًا أنه لا يمنعها من غناء مهرجانات إذ أرادت: «تاج اسم جديد وأنا أول اسم اسميه، ولو كبرت وطلبت تغني وتعمل مهرجانات، هي لما تحب حاجة لازم أعملهالها، نفسي أعمل لبنتي كل حاجة حلوة».

نصيحة حمو بيكا للأزواج

ووجهه حمو بيكا نصيحة للرجال في طريقة تعاملهم مع زوجاتهن، قائلًا: «لو دلعتها وأنت فاضي أو تجبلها برفان، الأهم الرجالة تتقي ربنا في مراتاتها وهما جنس ناعم وطيبين بس هما فراعنة بقى لكن بنضحك عليهم بكلمتين، ومش في كل الأوقات ملاك، اللي أنا بطلبه منها بتعمله واللي هي عايزاه مني بعمله وأنا مبسوط في حياتي».

حمو بيكا ومحمد رمضان

وكشف مؤدي المهرجانات حمو بيكا، رأيه في نوعية أغاني الفنان محمد رمضان، بجانب رأيه في أغاني الراب وويجز، مؤكدًا أن جميع المهرجانات الخاصه به ناجحة ونالت على إعجاب الكثير من الجمهور.

وقال حمو بيكا أن الفنان محمد رمضان ناجح فنيًا، مشيًرا أنه لو بدأ الفن بالغناء لم يحقق هذا النجاح الذي هو عليه اليوم.

وأوضح حمو بيكا: «محمد رمضان له جمهوره الخاص ويتحط مع ويجز في النجاح، لو كان بدأ في الغناء مكنش اتشاف من قبل التمثيل لأنه خدمه، ومسحبش مننا البساط واحنا نجوم ولينا ناس وشعبية وجمهوره جمهورنا».

رأي حمو بيكا في أغاني ويجز

وتطرق حديث حمو بيكا عن رأيه في أغاني ويجز، إذ قال: «أنا مبفهمش كلام الراب إزاي الناس هتفهمه، أنا اختارت أغني مهرجانات شعبية عشان بتحكي عن الواقع واللي بنمر بيه، وفي كلام جوانا كتير مبنعرفش نعبر عنه ف نعبر عنه بالمهرجانات، انا بحب الأغاني بشكل عام مش مهرجانات بس».

وأضاف حمو بيكا: «ويجز حد محترم ومشرفنا برا مصر وجوه مصر، بس ممكن في ناس مبتفهمش لغة الراب وكلام ويجز مش مفهوم برضو، يعني الطفل اللي عنده 11 سنة حافظ أغاني المهرجانات كلها، وممكن يغني أجنبي أفضل يتفهم».