حنان شوقي: أنا محجبة وأتمنى أكون في قصة حب

علقت الفنانة حنان شوقي على شائعات ارتدائها الحجاب، قائلة: «لما بتكلم عن الحقيقة بيدوروا على مخارج الشيطان اللي متغاظ، وأنا بعرف أرد على الناس وبقول مش أنت اللي خلقتني علشان تتحكم فيا».

تصريحات حنان شوقي

قالت حنان شوقي في تصريحات تلفزيونية لها: «البني آدم لما بيحب ربنا كويس جدًا عمره ما بيتعدى حدوده على الآخر، لأنه دع الخلق للخالق.. أنت متعرفش العلاقة بيني وبين المولى عز وجل، أنا محجبة مين قال إني مش محجبة».

وتابعت: «تقصدي لبس الشغل؟ ولا على قلبي؟ أنا محجبة سمعًا وقلبًا وروحًا وعينًا وكلامًا وأفعال، من أتى الله بقلب سليم.. أقوى حجاب في الكون اسمه حجاب الجوارح، أنا بحترم أي إنسان في الوجود، أعمل اللي أنت عايزه وحاسه بصدق، أنا لا أتعدى حدود الآخر».

حنان شوقي

حجاب حنان شوقي

واستكملت حنان شوقي قائلة: «أنا محجبة حجاب غالي جدًا، وسمعت من ناس كانت بتقول على الحجاب لبس الشغل وده أيام العالم الإرهابية، لما كانوا منتشرين وجالهم حد لابس بدلة قالوا له أنت مش لابس لبس الهيئة ليه؟».

وأوضحت رأيها بأزمة الفنانة حلا شيحة، قائلة: «أنا مبقرأش الحاجات اللي في صفحة حلا، أنا مع نفسي بس، إنما الحالة بتاعة حلا لا يعلمها إلا اللي خالقها، وأنا بحترم كل آرائها، وهي حرة أنها ترضي جوزها لو طلب منها تتحجب».

أسرار حنان شوقي

كما أعربت الفنانة حنان شوقي عن أمنيتها في الارتباط مرة أخرى، معلقة: «الحكاية بين الراجل والست حرب، ودي بعيدة كل البعد عن الحب الحقيقي، وأنا بالنسبة ليا أنا أنت، وياريت أبقى في قصة حب، والست بـ 100 راجل، أحميه زي ابني، وألبسه وأحطله برفان وأقص له أظافره».

وأضافت: «وألمع له حزائه وألبسه الشراب، وهو يعملي كده، والحبيب الزوج ده بيبقى ابني وصديقي وأخويا وأبويا وأمي وصاحبي وكل حاجة في حياتي، فأنا بفصل في تعاملاتي، وأنا لما بحب بعمل كده».

وفيما يخص علاقتها بوالدها، قالت: «بابا كان صاحبي من وأنا صغيرة، أنا بالذات عن إخواتي كان صاحبي جدًا، ولو حصل موقف حصل وحد عاكسني في الشارع وسألني عملتي إيه أقوله مردتش، يقولي شاطرة لأنك مش عايزة تردي وخدت منه حنيته ورجوليته وجدعنته، وهو اللي زرع جوايا الصدق وإني أقول الحقيقة، وزرع فيا المسئولية وإزاي أتعامل، ولما أبويا انتقل لـ رحمة الله كنت صغيرة أوي وكنت محتاجة ليه، وربنا صبرني وصمدت صمود الجبال، ومكنتش مصدقة إنه انتقل إلى رحمة الله».

حنان شوقي