حنان مطاوع تستعيد وفاة والدها المؤلمة: ربنا عافاني من مشاهدة سكرات الموت

روت الفنانة حنان مطاوع ما حدث يوم وفاة والدها الفنان الراحل كرم مطاوع، بتأثر كبير.

قالت حنان مطاوع عبر تصريحات تلفزيونية: «أنا كنت في الجامعة وببقى معاه كل يوم في المستشفى.. يومها أنا مشيت متأخر أوي وكان تعبان أوي ولونه كان أبيض بابا أسمراني كان لونه أبيض، كنت قاعدة ماسكة إيديه مستنياه يقولي بحبك وأنا أقوله بحبك وهو مش بيقول وأنا مش بقول».

وتابعت: «كان المفروض الصبح أروحله وكان أول يوم كنت مبروحش الجامعة وبروح له هو، ماما صحتني يلا تروحي لباباكي المستشفى قلتلها ثانية واحدة هنام شوية، وكانت أول مرة أقول كده كنت بقوم أنط أقعد في المستشفى عشان ميحتاجش أي حاجة وكأن ربنا عافاني إني أشوف سكرات الموت لأني كنت أصغر وأضعف من إني أشوف التجربة دي لحد ما روحت المستشفى».

واستكملت حنان مطاوع: «ولقيت صحفيين تحت ففهمت أن في شيء مش طبيعي وطلعت لقيتهم بيصوروني وأنا مش فاهمة بتصور ليه والناس في المستشفى كانوا أصحابي لأني كل يوم بقعد هناك كلهم يسلموا عليا ويطبطبوا، لحد ما طلعت فوق ودخلت ولقيت بابا توفى، فضلت مش فاهمة حاجة والكل بيقولي أقريله الفاتحة».

واختتمت: «وأنا مش عارفة أعمل حاجة نسيت اللغة نسيت كل حاجة، إلى أن أدركت أن الصلة مش بتنتهي بالوفاة بتنتهي بوفاتي أنا دي حاجة ريحتني إني هفضل خير ليه أعمل صدقات وأدعيله».