«خسر فرص بسببه».. حكاية مجد القاسم مع السيرة الذاتية لفريد الأطرش

تحدث الفنان مجد القاسم عن عرض تقديمه السيرة الذاتية للفنان الراحل فريد الأطرش، بجانب رفضه مسلسل ذئاب الجبل.

قال مجد القاسم في تصريحات تلفزيونية له: «اتعرض عليّ مسلسل ذئاب الجبل ورفضته وبعدين ندمت، كنت عايز أعمل مسلسل فريد الأطرش وكل ما نوصل للاتفاق وهنبدأ نصور يحصل حاجة ومتمش العمل وخسرت فرص بسببه».

تصريحات مجد القاسم

وقال عن أغنيته الشهيرة «غمض عينيك» التي تعاون خلالها مع الفنانة مي كساب، إنه أول من اكتشف موهبة مي، مضيفًا: «أغنية غمض عينيك مكنتش أغنية دويتو، كانت سينجل ولما سمعت الأغنية كانت اختيارتي حذرة جدًا وقولت عايزة أعملها دويتو لأن كان منتشر وقتها الأغاني الدويتو الإيقاعية وناجحة، وقولت نعمل أغنية دويتو بين حبيبن ويرقصوا عليها سلو».

واستكمل الفنان مجد القاسم: «بدأنا ندور على المطربة وتقريبًا سمعت 100 صوت وفيها أصوات هايلة ولكن مكنش الصوت اللي بدور عليه، لأني كنت بدور على صوت فيروزي ونجاة، لغاية ما الأستاذ أسامة صبري قالي أنا عندي طالبة وسمعتها وحسيت أن البنت دي راكبة على الأغنية وقولتلها مبروك عليكي».

أسرار مجد القاسم

وأضاف: «والشركة كانوا اتفقوا على نجمتين وقالوا لازم نجمة ونجم قولتلهم أنا هجيب صوت ماحدش يعرفه عشان عارف الأغنية دي رايحة فين، ولما جت مي الاستوديو وغنت كله صقف لها ونزل الألبوم وكسر الدنيا، وكنا هنصور أغنية أسمع بقى وعملنا ورشة ومدير التصوير والمخرج».

وقال مجد القاسم أيضًا: «وكنا نازلين ناكل وكان في طلبة كتير ومصدقوش وجريوا عليّ وبقوا يسألوني مش هتصور غمض عنيك؟ مدير التصوير سألني إيه أغنية غمض عنيك؟ قولتله دي أغنية دويتو في الألبوم، وقالي هنصور الأغنية دي، واتصلت بـ مي كساب وتاني يوم كنا بنصور في الفيوم».

ابتعاد مجد القاسم عن الفن

وقال عن استبعاده من الساحة الفنية وترحيله من مصر، بسبب اتجاهات شقيقه السياسية، وعودته من جديد بعد 3 أشهر، مضيفًا: «الفترة دي كانت صعبة، لأني كنت في عز نجوميتي ونجاحي ومكسر الدنيا، وكنت القاسم المشترك في كل حفلة في مصر والوطن العربي».

وتابع الفنان مجد القاسم: «وفجأة يتقفل عليا في كل الوطن العربي لأني أخو فيصل القاسم، طيب أنا فنان ومش بوافقه في اتجاهاته، ولكن كل ده علشان أنا أخوه، وطبعًا مُنعت من الحفلات والتليفزيون في مصر والوطن العربي واترحلت، لغاية ما رجعوني تاني».

وكشف مجد القاسم تفاصيل مكالمة الزعيم عادل إمام له، قائلًا: «في ناس كتير وقت أزمتي كان معرفتي بيها قليلة وطلعوا أجدع ناس، وأول تليفون جالي بعد الأزمة كان حميد الشاعري بيتطمن عليا، وتاني تليفون كان من الفنان الكبير عادل إمام وطمني وقالي متشلش هم قريب جدًا هترجع وأنا هتكلم في موضوعك».

مجد القاسم