خناقة فنية بين شوبير وموسيماني.. القصة الكاملة لأزمة الإجازات وموقف مصطفى

اشتعلت حرب التصريحات مؤخرا، بين بيتسو موسيماني، المدير الفني لفريق الكرة الأول بالنادي الأهلي، والإعلامي أحمد شوبير، بشأن الإجازات التي يمنحها المدرب الجنوب إفريقي، للاعبي القلعة الحمراء.

البداية مع شوبير : إجازات طويلة بدون داع

وقال الإعلامي أحمد شوبير :' مش هغير كلامى ومش هبطل أقول اللى بيحصل فى الأهلى غلط ومش مظبوط، ودى الحاجة الوحيدة اللى مخليانى قلقان رغم أن فرص صعود الأهلى لربع نهائى دوري أبطال أفريقيا 99.9%، إزاى الأهلى ياخد راحة 8 أيام، فى لاعيبة كتير مش بتلعب ومعندهاش إجهاد وكان لازم يرجعوا للتمرين بدري، يعنى إيه الفريق يرجع يوم 27 مارس وعنده مباراة يوم 2 أبريل، بجد إزاى حد يفهمنى ليه الأهلى النادى الوحيد فى مصر اللى مبيلعبش مباريات ودية'.

وتابع شوبير، 'الناس عملت برامج ترد عليا وانا بردو مصمم ومش هغير كلامى وأعتقد أنا بفهم شوية فى الكورة وكنت بلعب زمان لو نسيتوا يعني ، وحد بيقولى أصل دى مدرسة جديدة ياكابتن فى التدريب، والله بحكم شغلى بتابع كل الدوريات ومسمعتش عن المدرسة الجديدة فى التدريب دى غير فى الأهلي'.

أحمد شوبير

موسيماني يرد : كرة القدم تغيرت

وقال بيتسو موسيماني، عقب نهاية المؤتمر الصحفي الخاص بمباراة الأهلي والاتحاد السكندري:'كرة القدم في زمن أحمد شوبير كانوا يلعبون مباراة كل أسبوع أو ١٠ أيام ، أنا أحب أبنه مصطفى شوبير ولكن مع احترامي لوالده كرة القدم تغيرت الآن وأصبح هناك ضغط مباريات كبير يجب أن أحافظ على لاعبي الفريق'.

أحمد شوبير يحتفل مع نجله مصطفى شوبير بتتويج الأهلي

شوبير يعاود الهجوم من جديد : لسه مصمم على رأيي

‏من جانبه، قال أحمد شوبير ردا على موسيماني، في تصريحات إعلامية : 'مبحبش ادخل مصطفى في الأمور دي بالصدفة هو اسمه مصطفى شوبير. بختلف مع موسيماني في حتة الاجازات ولسه مصمم على رأيي في الاجازات ٨ ايام كتير ودي وجهات نظر فنية ولكن بحترم الراجل وهو محقق نجاحات ولكن انت محتاج ماتشات ودية عشان اللاعيبة اللي بعيد تشارك ولما تلعب تكون جاهزة.'.

وأضاف:' أنا صحيح عدد الماتشات أيامي مختلف والبطولات أقل لكن كنت بلعب أهلي ومنتخب وفي سنة لعبنا اكتر من ٣٠ ماتش مع المنتخب. موسيماني عنده أرقام كبيرة محدش يقدر ينكرها والمجمل بتاعه ممتاز كبطولات وانجازات ولكن يظل الخلاف الفني طبيعي واحساسي إن نتيجة الاجازات لياقة اللاعبين مش تفضل حاجة، ولكن هو كمان بيعمل روتيشن مهم عشان الاجهاد'.

أحمد شوبير عن «هاتريك» بنزيما : «‏ظاهرة تستحق الدراسة»

تعليق ناري من شوبير على تلميح محمد صلاح لإعتزاله الدولي