«خوف وسفر خارج مصر».. أسباب اعتزال محمد سامي الإخراج التلفزيوني

أثار المخرج محمد سامي التساؤلات بشأن أسباب اعتزاله الإخراج التلفزيوني، الذي أعلنه في الساعات الأولى من صباح اليوم الخميس 20 مارس الجاري.

وأوضح محمد سامي أسباب اعتزاله الإخراج التلفزيوني، في منشور عبر حسابه الرسمي بموقع فيس بوك.

أسباب اعتزال محمد سامي

وأكد أنه سيسافر خارج مصر لمدة عامين من أجل الدراسة، وتابع: «معنديش حاجة أكتر أقدر أقدمها في التلفزيون، وخايف من تشبع الجمهور من أسلوبي ومن الوقوع في فخ التكرار ودائرة المتوقع والملل والوحيد القادر علي الدوام هو الله وحده».

وكتب المخرج محمد سامي في منشور اعتزاله إخراج الدراما التلفزيونية: «وداعًا الدراما التلفزيونية.. السنة دي كانت آخر أعمالي التلفزيونية، واللي فيها بودع المسلسلات، رحلة طويلة حوالي 15 سنة، قدمت فيهم كل اللي قدرت عليه لإسعاد الجمهور العربي، وحققت بفضل ربنا نجاحات مع نجوم كتير ومع شركات وقنوات كلها مهمة».

اعتزال محمد سامي الإخراج التلفزيوني

وأضاف: «وكان دايمًا الجمهور بيشجعني، سواء بردود الأفعال أو بتصويته ليا في الجوائز، وأي نجاح حققته كان بفضل ربنا والجمهور، يمكن المقربين ليا عارفين إني واخد القرار ده من فترة وهو اعتزال الإخراج التلفزيوني ولكن كنت بنتهي من التزامات موقعة مع شركات ونجوم والحمدلله انتهيت منها وكان آخرها 2025».

واستكمل المخرج محمد سامي: «الحمدلله آخر عملين ليا إش إش وسيد الناس حققوا نجاح أنا سعيد بيه، كل يوم بلدي العظيمة مصر بتطلع صناع جداد موهوبين ومثقفين ويقدروا يقدموا أفضل من اللي قبلهم.. وهنفضل طول الوقت بنقدم أعمال مصرية يلتف حولها الجمهور العربي، بشكر كل حد ساعدني في الرحلة وبشكر كل زميل منافسته كانت دافع للتميز، بعتذر عن أي مشهد قدمته أثناء الرحلة ولم يلقي استحسان الجمهور أو إعجابهم في الآخر الفنان دايمًا بيجرب والفنون جنون زي ما بيقولوا، أدعولي الفترة الجاية عندي سفر خارج مصر لفترة عامين بتعلم فيهم حاجة جديدة بدرسها».

محمد سامي

تصريحات محمد سامي

واختتم محمد سامي: «حاجة كان نفسي أتعلمها من زمان وأجلتها كتير لحد ما لقيت نفسي بكبر وخايف يفوت العمر قبل ما أعمل حاجة نفسي فيها، مقتنع إن الشخص يقدر في أي وقت يقرر يوقف حاجة بيحبها عشان يعمل حاجة تانية بيحبها برضه وعايز يجربها بس محتاج عيلة تسانده علي إتخاذ قراره، كل التوفيق لكل زمايلي وبحبكم وبشكركم على سنين المنافسة الجميلة اللي عملت أسمائنا كلنا وأتمنى لنفسي التوفيق في الخطوة الجديدة».

وزعم البعض من رواد مواقع التواصل الاجتماعي، أن الانتقادات والهجوم على مسلسل إش إش ومسلسل سيد الناس في رمضان 2025، قد يكون من أسباب اعتزاله الإخراج التلفزيوني.

حتى أن الفنان تامر حسني دعمه، قائلًا: «إوعى تكون عايز تبعد عشان أي إحباط جايز يكون فعلاً في بعض المشاهد اللي الناس انتقدتها وأنا شخصيًا استغربتها شوية وقولت جوايا أنك مش محتاج تعملها أصلاً لأن عندك الحقيقي والأهم بس على رأيك الفنون جنون أحيانًا فكرة مجنونة تنال الإعجاب وفكره لأ.. بس ده ميخليناش ننسى إنها بعض مشاهد مش بعض أعمال لأنك بالفعل المخرج الوحيد في تاريخ مصر اللي مفشلش ولا مرة ويمكن الحظ محالفكش أوي في عمل ولا 2 على مدار 14 سنة ودي حاجة مينفعش الجمهور ينساهالك».