رئيس مهرجان الغردقة لسينما الشباب يكشف مفاجآت الدورة الثالثة.. فيديو

كشف الكاتب والسيناريست محمد الباسوسي رئيس مهرجان الغردقة لسينما الشباب، تفاصيل الدورة الثالثة المقرر إقامتها خلال الفترة من يوم 25 سبتمبر المقبل وحتى 30 من الشهر نفسه.

قال السيناريست محمد الباسوسي في لقائه مع الإعلامي أحمد دياب، ببرنامج صباح البلد المذاع على قناة صدى البلد: «قبل ما نعرف تفاصيل الدورة الثالثة في البداية أشكر كل الداعمين لمهرجان الغردقة، فكرة المهرجان جت إزاي؟ إن إحنا معايا أصدقائي الأستاذ أحمد نجار والأستاذ قدري الحجار صحفيين كبار فبيفكروا يعملوا مشروع، طب نعمل إيه؟، وأنا كنت ماسك رئيس المركز القومي للسينما وعملت دورة من أهم الدورات كانت الدورة الـ 22 في مهرجان الإسماعيلية أيام الكورونا  فعملت دورة ناجحة جدًا، فهم فكروا ييجوا لي عشان يعملوا مهرجان».

تفاصيل مهرجان الغردقة لسينما الشباب

وأضاف: «بصعوبة شديدة جدًا اخترنا، بعدت عن كل المناطق الموجودة، اخترت مدينة الغردقة، وهذا نوع من الذكاء شوية إن أنا بختار مدينة زي دي لأنه لما تيجي تعزم أي ضيف أجنبي أو أي ضيف عربي وتقول له مدينة الغردقة، مش محتاج تقول له الغردقة إيه، لأنه هو عارف الغردقة نظرًا للسمعة العالمية السياحية اللي موجودة، فده تنشيط للسياحة».

واستكمل السيناريست محمد الباسوسي: «من الدورة الأولى، أولاً أشكر الفنان حسين فهمي كان أول داعم للمهرجان، لما كلمته في مهرجان كان، قلت له أنا بعمل مهرجان، ثقته فيا ولأنه عارف تاريخي واشتغلنا مع بعض قبل كده، فقال لي أنا معاك وداعم ليك، وكانت البداية القوية إن كل الناس بدأت تؤمن أن هناك مهرجان هيتعمل بجد اسمه مهرجان الغردقة لسينما الشباب، واخترت الشباب لأنه ده اتجاه العالم واتجاه الدولة، الدولة المصرية اتجاهها التركيز على دعم الشباب، فبالتالي لما تيجي تفكر بقى طب هتجيب مصاريف منين وهتجيب دعم منين؟ خصوصًا إن وزارة الثقافة مابتديش دعم في أول سنة ولحد دلوقتي مخدناش دعم يعني لا أول سنة ولا ثاني سنة ولا ثالث سنة».

تفاصيل الدورة الثالثة من مهرجان الغردقة لسينما الشباب

وقال أيضًا: «اللي كان بياخد دعم بياخد دعم، وأرجو إعادة النظر في مثل هذا الأمر يعني، من خلال لجنة تقصي حقائق تشوف مين المهرجانات القوية، مين المهرجانات اللي محتاجة أن يتم دعمها، ووزارة السياحة تدعمنا وهيئة تنشيط السياحة، الوزير أشرف صبحي داعم قوي جدًا ووعدنا إنه هيكون موجود افتتاح الدورة الثالثة إن شاء الله».

وأضاف رئيس مهرجان مهرجان الغردقة لسينما الشباب: «السينما أكثر وسيلة تحاول بقدر الإمكان تعرض لك القضية بتاعتك وأنت بتجيب شباب من السينما، بتجيب مخرجين من السينما العالمية، السنة دي عندنا مخرج مثلًا من ألمانيا، عندنا مخرج من روسيا، وعندنا السنة دي لجنة تحكيم حد جاي من روسيا، ومن ألمانيا، ومن إيطاليا، بالإضافة إلى نجومنا السنة دي، وأعلنت عن تواجد نرمين الفقي في لجنة تحكيم الأفلام».

واختتم: «ما يميز الدورة الثالثة، وجود الشباب اللي نجحوا السنة دي، ومن أهم الداعمين مسعد فودة، نقيب السينمائيين ورئيس الاتحاد العام للفنانين العرب، السنة اللي فاتت عمل المؤتمر السنوي بتاعهم، شوف بقى مدى التنشيط للمهرجان، للسياحة، وجاب معظم الفنانين اللي هم نقباء في بلادهم في الدول العربية كلها، وكانوا موجودين معانا في المهرجان، وهيعملوا مؤتمر هذا العام أيضًا».